Euro 2016 a Portugal lo champion pui tawhtu Fernando Santos chuan Qatar World Cup quarter-final atanga an tlak hnuin Portugal coach a nihna chu a bansan.

Portugal hian quarter final-ah Morocco hneh loin an tla a, Euro 2016 leh Nations League title hial a lo lakpui tawh avangin Qatar-ah pawh hian Portugal leh Santos-a lakah beiseina an nei sang hle a, Morocco hneh loa an tla ta hi mi mak tih pawh a hlawh a ni.

Portuguese Football Federation (FPF) chuan Santos-a a ban thu hi puangin, “FPF leh Fernando Santos te chuan kum 2014 September thla atanga tluang taka kan lo thawh ho hnuah kan inzawmna kan ti tawp ta a ni.

“Portugal team tan theihtawp min chhuahsak a, Qatar World Cup thlenga a enkawl hnuin FPF leh Santos te chuan kawng hran ve ve kan zawh hi a hun tawhin kan hria.

“Fernando Santos ang nation team head coach-a kan nei thei hi a ropui kan ti a.

“FPF pawhin a chungah leh a technical team-te chungah hlawhtling taka kum 8 chhung min he team an enkawl tawhnaah lawmthu kan sawi duh a ni,” tiin thuchhuah an siam a ni.

Santos a ban lai hian an captain Cristiano Ronaldo erawh chuan ram tana inkhelh a chawlhsan dawn leh dawn loh a la chiang lo thung.

International football-a goal thun hnem ber Ronaldo hian kumin World Cup-ah beisei a pha tawh lo a, nakkum February thla mai hian kum 38 a tling tawh dawn.

Portugal-in knockout round an khelh pahnihah Santos hian Ronaldo hi inkhel bul a tantir lo ve ve a, hemi avang hian sawiselna a tawk nasa hle. Ballon d’Or vawi 5 dawng tawhtu a khelh tam tir lo hi Santos chuan a hnuah a inchhir loh thu a sawi.

Ronaldo bialnu Georgina Rodriguez leh Santos inkar pawh hi a tha loa, Instagram lamah Georgina hian Santos hi “thutlukna dik lo” a siam thu a tarlang a, “Khawvela player tha ber leh i hmanraw neih that ber hi i dahhniam thei lo ang,” tiin a lo ziak lang ve bawk a ni.

Santos-a enkawlna hnuaiah hian Portugal hian inelna lian thama hlawhtlinna an hawn chu Euro 2016 kha a ni a, hetah hian final-ah France chu 1-0 a hnehin an champion. Hemi hnu kum 2019 khan Nations League final-ah Netherlands chu 1-0 bawka hneh lehin an champion leh a. Euro 2020-ah erawh Belgium hneh loin round of 16 atangin an tla leh a ni.

Santos hian kum 2024 thleng Portugal-ah hian contract la nei mah se mak tak maia Morocco laka hnehna an chan zawh loh avangin Portugal nen an inthen a ngai ta a. Amah thlakna tur hian AS Roma coach Jose Mourinho hming te lam rik a ni.

Mourinho hi an la lut thei a nih chuan Champions League lama Porto leh Inter lo champion pui tawhtu khawvela coach hlawhtling ber pawl an ruai thei dawn tihna a ni ang.