Manchester United midfielder hlui Nemanja Matic a tawngchhuak a, Old Trafford-a hun a hman laiin player awm tha duh lo an awm nual tih a sawi. 

Kum 35 mi hian 2017 leh 2022 inkar khan a chenchilh a, FA Cup leh UEFA Europa League-ah te final lutin champion-na an nei lo.

YU Planet-in an kawmnaah Matic chuan, "Chelsea-a kha chuan player tinte an puitling a, hauh ngai emaw zilh emaw ngai an awm mang lo. A hun takah kalin training-a tlai an awm ngai lova, United-ah erawh nitin deuhthawa tlai an awm. 

"Tan huna thleng ngai lo zingah hian Paul Pogba leh Jadon Sancho an langsar fal nalh a, pahnih-khat tlai ngun deuh an awm bawk.

"Hun a liam deuh hnuah a hun taka thleng thinte kan thinrim a, a ruka disciplinary committee dinin president ka ni nghe nghe. Lehkhapuanah training-naa tlai thinte hming leh an chawi tur zat ka tarchhuak a.

"Season khat chhung lekin £75,000 kan hailut thei. Kan pawisa hmuh hi party nana hman kan tum laiin hripui a leng a, kan tum angin kan ti thei ta lo." tiin a sawi.

Pogba hian 2016 Thitin thla khan £89m-in United a zawm a, nikum nipui lai khan a thlawna chhuahtir niin Juventus-ah a kir. 

Sancho hian nikum Vawkhniahzawn thla khan Borussia Dortmund atangin a zawm a, kum nga daih contract ziakin £73m man lai ni mahse beisei a pha lo hle. 

Red Devils tan hian game 82 khelin goal 12 a khung tawh a, Ten Hag nena an inhmuh thiamloh hnuah ala inkhel leh lo a ni.