Doping dan a bawhchhiat avangin Paul Pogba chu kum 4 chhung atan hrem a ni a, mahse a thubuai hi Court of Arbitration for Sport-ah khing letin, a hremna hi tihnep sak a ni ta a, thla 18 chhung chiah hrem a ni dawn ta a ni.

2018 World Cup-a France champion puitu kum 31 mi hi August 2023 khan testosterone metabolites test-ah a positive a, khami tum khan tiam chin awm loin hrem a ni nghal.

Italy anti-doping agency te chuan a rei thei ang ber, kum 4 chhung atan hrem an duh a, an duh ang ngeiin thil a kal chho. France midfielder hian tihsual a neih loh thu leh, a hriat lohna avanga hetianga talbuai a nih thu a sawi chhuak ve vat a nih kha.

Hetia a hremna tihhniam sak a nih takah chuan, Pogba chu kum 2025 March thla atangin a inkhel leh thei tan dawn ta a, a football career tawp mai tur nia ngaih a nih tawh laiin, tha taka inkhelh leh theihna hun a nei leh dawn ta a ni.

Pogba hian Manchester United-ah hun a hmang thin a, Juventus chu free transfer-in a pan a, kum 2016 khan Manchester United chuan an club record £89m laiin an lei let leh. Old Trafford-ah a inbengbel hleithei lo a, Juventus lam a pan leh ta a ni.