Mauricio Pochettino chuan Tottenham chairman Daniel Levy leh club neitu Joe Lewis hnenah season thar inbuatsaih nan player leina tur £150million chuang a phut niin Telegraph chuan a tarlang.

Pochettino chuan Spurs chu trophy chawipui a tum ruh hle a, tuna a player neihte bakah team tichak turin player thar lakluh nual a duh. World Cup hmain hna tam tak thawh hman a duh niin Telegraph chuan a tarlang a, Spurs hian he Argentine coach hi contract thar an zawrh mek a, kum khat chhunga £8.5million hlawh theihna contract duhawm tak hi Pochetinno chuan a ziak dawn nge dawn lo tih chu Spurs hotute lamin player thar lei an phal leh phal lovah a innghah tur thu a sawi niin Telegraph chuan a tarlang bawk.

Spurs player pawimawh Harry Kane, Dele Alli, Christian Eriksen, Jan Vertonghen, Eric Dier leh Hugo Lloris te chuan contract thar an ziah leh ngei a rinawm hle a, hetih lai hian sum lakluh nan Pochettino chuan Toby Alderweireld, Danny Rose leh Mousa Dembele-te chu a chhuahtir mai a rinawm bawk. Tin, Victor Wanyama, Fernando Llorente leh Moussa Sissoko te hma hun tur pawh a sawi chian theih loh a ni.

Pochettino hian Crystal Palace forward Wilfried Zaha hi rei tak atanga khan a lo ngaina tawh a, ani hi an la dawn a nih chuan £50m vel an sen chu a ngai ngei ang. Hmatawng lam tih khauh an duh tih a chiang bawk a, Spurs hian Fulham player naupang Ryan Sessegnon pawh lak ngei tumin an dawr dawn niin sapram chanchibu te chuan a tarlang. Ani pawh hi a tlawm dawn hauh lo mai, £50m emaw vel chu a nih ngei rin a ni.

Manchester United-a hmun chang tam lo Anthony Martial pawh Spurs nen sawi zawm a ni ve mek bawk a, Atalanta-a loan-a khel mek Bryan Cristante leh Real Madrid midfielder Kovacic te pawh Spurs mi duh zinga sawi an ni bawk.

Tottenham hian stadium an sa zo tep tawh a, Champions League an khel dawn bawk nen, sum lamah chuan harsatna an tawk tam dawn lo niin a lang. Team khawng tak niin season khat mai ni lo, season 4 lai chu a chung lamah an awm thei a, hei vang hian trophy chawi chu tuna an tum ber a ni tawh dawn a ni.