Arsenal chuan tun nipui bazar chhungin player pathum an lalut tawh a, player dang pawh lakluh leh an la tum niin a lang a, Gunners manager Mikel Arteta chuan player lei nan hun a la awm tih a sawi.

Arsenal hian tun nipui bazar chhungin pound maktaduai 208 lai an seng tawh a, Chelsea atangin Kai Havertz an lalut a, Ajax atangin Jurrien Timber an lalut leh a, West Ham atangin pound maktaduai 105 lai sengin Declan Rice an lei bawk.

Arteta hian a squad panna lai te a thawm tha kim tawh viau niin a lang a, chanchinbu thenkhat chuan player an lakluh belh tawh dawn lo angin sawi mah se, Arsenal hian player an lakluh belh lovang tih a la sawi theih loh.

Arteta chuan, “Kan player lakluh tawh te hian team tan tangkaina tur an nei vek a, kan player duh tak te kan lalut thei hi kan lawm hle bawk. Kan lalut hma a, team-ah pawh an isniamrem chak hle. Team tana an tangkai theih nan insiamremna hun an nei a, keini pawhin anni buatsaihna hun kan nei a ni.

“Bazar nan hun a la tam a, kan player kawlsaah te pawh beiseina a sang em em bawk. Kar hnih dang chhung vela thil awm dan kan en ang a, bazar lamah kan beng kan chhi reng dawn a, player chhuak tur te tan pawh hun a la awm tel bawk a ni,” tiin a sawi.