Part 1 kan post tawh a, a thui dawn em avangin hlawm hniha kan then thu kan tarlang a nih kha. Tun nipui bazar inhawn laia player che sawn zinga langsar tak tak te an che tha chhunzawm em? Tih kan chhui kual a, Part 1 la chhiar lo kan awm chuan link kan dah e aw. Tichuan kan chhunzawm leh nghal mawlh mawlh ang.

Part 1 chhiar duh tan link hi click mai tur a ni : Player che sawn te an che tha zui em? Part 1 

Raphinha

Chelsea-in lei tumin an dawr nasa, mah se Barcelona lamin £55m-in an lei ta zawk kha a ni a. La Liga lamah a insiamrem nghal vat.

Barcelona tan league game 6 khel tawhin goal 1 a khung bakah assist vawi 1 a nei tawh bawk. Barcelona coach Xavi chuan, "Tharum a ngah a, kan attacking min pui nasa lem lo, mah se defending lamah erawh kan thahrui a ni e. Khingpuite a hnaih zung zung a, football player tha chungchuang tak a ni, a chungah hian rinna ka nghat ngam a ni," tiin Raphinha chungchang a sawi a nih kha. 

Barcelona hian transfer fuh lo tak tak nei thin mah se tun nipui bazar inhawn laia an lak luhte hi chu an tifuh hlawm chho hle niin a lang.

Marc Cucurella

Brighton-in tlawm takin an lei a, Chelsea hnenah £55m laiin an hralh ta a nih kha. Chelsea chhungkua an buai a, season bul pawh an tan tha tawk lo. Cucurella pawh a'n talbuai deuh tak nain a insiamrem chho mek a, Chelsea tan Premier League game 6 khel tawhin assist vawi 2 a nei tawh.

Blues tan player tangkai tak a ni chho ngei dawn niin a lang. Tin, Thomas Tuchel an ban hnuah Chelsea chuan Graham Potter a la lut a, Brighton-ah Potter hian thiam takin Cucurella hi a lo enkawl tawh thin a, Chelsea-ah pawh an inchhawr thiam leh viau rin a ni.

Alexander Isak

Transfer bazarah a hming a ri ring, Newcastle United chuan £58m in an la lut ta kha a ni a. Newcastle-in season bul an tan tha lo, a club thar te che tha lo mah se Isak erawh Real Sociedad-a a thiam angin a la thiam reng tho.

Premier League game 3 khel tawhin goal 2 a khung nghal a, a khelh chhunah a theihna sang tak kan hmu nghal. Premier League-ah pawh a rawn tlangnel nghal em em, a la naupang a, hmabak eng tak a nei a ni.

Matthijs de Ligt

Juventus atangin £60m-in Bayern Munich a zawm, Bundesliga lamah bul tan tha em em lo mah se Champions League lamah erawh an che tha nghal hle. Player la khawm nasa Barcelona pawh an hneh a nih kha.

Dutch defender hian Bayern Munich a pan chhan chu Champions League no mawi chawi a chak vang a ni a, "Juventus kha team ropui tak an ni, chutih laiin hemi hmun ka rawn pan hi ka tan chuan hmasawnna a ni a. A chhan chu Bayern Munich hian champions League no mawi chawi hi an duh tih ka hria, Juventus-ah kha chuan hetiang rilru hi kan pu lem lo a ni," tiin a sawi a nih kha.

A la naupang a, Bayern Munich hian an la lut fuh dawn hle niin a lang.

Casemiro

Manchester United-in Frenkie de Jong an rim emaw tih laiin Casemiro an la lut thut a nih kha, Real Madrid atangin £60m-in United-in an lei. United-in central midfielder tha an mamawh em em laiin ani ang player tha an lei thei hi an ti fuh hle.

Season hmasa lamah McTominay leh Fred te an inkawp thin, an che tha lo thin hle a nih kha. Chutih laiin Casemiro a lut chiah chu McTominay pawh ropui takin a rawn khelh theih phah a. Erik Ten Hag chuan a chhawr nghal mawlh mawlh lo a, Premier League boruak te a thlirtir hmasa te te ni tein a lang a, an la inchhawr chho dawn chauh niin a lang.

Erling Haaland

Manchester City-in Haaland an la lut hi chu an tifuh thlawt e. A man lah a to em em si lo, £63m chauh a ni a, transfer window inhawn hmain engkim an ti chiang hman vek a nih kha.

Haaland-a'n City a pan dawn tih thawm a rik lai khan mi tam tak chuan, "Premier League-ah chuan a che ropui thei lo ang, inhliam a hrat si, Premier League game hautak leh defender khawng tak tak kiangah goal a khung hleithei lo ang ,"te an ti a nih kha.

Premier League game 7 a'n khel ve dek dek a, goal 11 lai a khung nghal hem mai. Premier League defender-ten an chelh lo a ni ber mai, a pal darh vel mai mai ni berin a lang. 

Manchester City hian Champions League title lak an tum ruh hle, season dangah pawh team tha ber pawl ni thin mah se stage sangah an tlawm leh khut thin. Pep Guardiola chuan Centre Forward a zawng a, a duhthusam a hmu ta bawk a, tun season chu Haaland vang hian UCL no mawi chawi an inbeisei khawp ang le.

Darwin Nunez

Premier League club lian hrang hrang nen sawi zawm ni mah se £64.2m in Liverpool a zawm ta kha a ni a. Reds mamawh chhanna tur nia ngaih a nih laiin bul erawh a tan fuh chiah lo deuh. Crystal palace nen an inkhelh tumin red card a chawi a, hrem a ni chhunzawm bawk.

Premier League game 3 a khel tawh a, goal 1 khung tawhin assist vawi 1 a nei tawh bawk. A che tha over lo, mah se mamawh chhanna a ni chho thei dawn niin a lang thung. Liverpool-in season bul an tan tha tawk lo deuh a, inhliam an ngah ve bawk nen, rei erawh an chet chhiat a rinawm loh. Chutih hunah chuan Darwin Nunez tak tak hi kan hmuh chhoh a rinawm.

Aurelien Tchouameni

Kum 22 mi chauh la ni mah se Real Madrid-in Monaco atangin £70m laiin an lei a nih kha. Real Madrid chuan he player naupang hi a theihna an hrechiang a, tun season La Liga match-ah inkhelh bul a tan kim vek tep, vawi khat chiah a start lo a ni mai.

Defensive midfielder pawimawh leh Real Madrid tana tawnhriat ngah em em Casemiro pawh an chhuahtir phalna chhan chu Tchouameni vang hi a ni kan ti lo thei lo. Real Madrid hian player naupang tha tak tak an nei sa bawk nen, tun season-ah pawh Europe-a team khawng ber pakhat an ni chho leh mek a ni.

Wesley Fofana

Chelsea-in Leicester City atangin £70m lai sengin an lei, a man ngaihtuah chuan beisei erawh a phak nghal lo tlat. Chelsea-in an player tangkai tak tak an chelh thei lo a, an talbuai deuh avangin season bul an tan tha lo. Blues tan Fofana khel pangngai thin hle mah se result duhthusam erawh a la hlawhchhuahpui thei lo deuh a ni.

Antony

Erik Ten Hag-a'n lak luh a tum ruh hle,  £85m laiin Ajax atangin an lei chhuak ta nge nge a. A debut game-ah Arsenal a hmachhawn nghal, United tan rei a inkhelh hmain goal a khung nghal pang mai.

United tan inkhelh tluan a la nei lo a, game thumah inlan tawhin vawi hnih a team-te a chakpui. Premier League-ah a tlangnel nghal hle, an chak zawn chhoh mawlh mawlh laiin Queen a boral hlauh a, chumi hnuah International Break a ni chhunzawm leh bawk, United tan game 3 bak a la ilan thei lo. Heti chung hian a khelh chhunah player danglam a ni tih kan hre thei a ni.