Tun nipui bazar inhawn lai khan player langsar tak tak an chesawn nual a nih kha, Premier League club te phei chuan £1.9bllion lai sum an seng. Chelsea leh Manchester United te chu English club zinga sum hmang nasa an ni a, Europe club lian dangah chuan Barcelona an che na phian bawk.

Nipui bazar liamtaa player chesawn langsar ho an club tharah an che tha em? Inkhelhna hmun an chang tam em? Tih te thlir kual ila.  Tin, player inleinaah hian add-ons kan telh lo a nia aw.

Lucas Paqueta

West Ham khan £37m in Lyon atangin an lei a nih kha. He midfielder hi talent nei tha tak a ni a, a che tha chho a nih chuan £50m thleng pawhin a man hi a sang chho thei dawn nia report a ni.

Hammers tan a inlan tawh a, mah se a theihna leh thiamna tak tak erawh hmu turin a la inkhel tam lo deuh. West Ham hian season bul an tan tha lo hle a, international break zawhah chuan Paqueta thiamna hi kan hmuh chhoh theih a rinawm.

Matheus Nunes

£40.5m laiin Sporting atangin Wolves-in an lei a nih kha, Pep Guardiola khan tunlaia player tha ber pawl niin a lo sawi tawh bawk nen, beisei a sang khawp mai. 

Nunes hian Wolves tan assist vawi khat a nei tawh a, an midfield nasa takin a thuam chak chho nia ngaih a ni. Kum 24 mi chauh a ni a, Wolves-ah hian rei tak a khel lo maithei bawk. Premier League game an la khel tlem a, an inkhelh chhunah chuan an lei fuh khawp mai kan ti thei awm e.

Robert Lewandwoski

Sum nei lo chung chungin Barcelona khan £40.5m in Polish striker hi an lei a nih kha. Kum 34 mi ni tawh mah se La Liga lamah a tlangnel khawp mai.

Tun season competition hrang hrangah Barcelona tan game hmasa 8 atangin goal 11 a khung nghal hem mai. La Liga lamah goal 8 a khung a, Champions League lamah hattrick a siam nghal bawk.

Xavi-a hnuaiah Barcelona an insiamtha chho mek zel a, chuta hmun lai lum chang reng tur leh Barca player pawimawh tak ni chho zel tur a ni tih a chiang a, rokhawlhnain a tlakbuak te a nih ngawt loh chuan Barcelona player lei fuh ber zingah chhiar tel a ni ngei ang.

Kalvin Phillips

Leeds United atangin £44m-in City in an lei a nih kha, inbiakna an kalpui laia kan lo tarlan tawh angin squad neih chhah tha Manchester City-ah chuan regular takin a khel thei lo.

England international hian City tan minute 14 chiah a la khel a, bench lamah hun a la hmang hnem. Tin, a dar hliam zai a ni bawk nen, a chawlh deuh chu a la ngaih dawn hmel a ni.

A hliam damin rawn fit tha chho leh ta pawh ni se Manchester City hian player an nei tha hlawm si a, World Cup lah a hnai tawh bawk si nen, Manchester City a pan hi a ti fuh lo maithei, mah se regular player ni thei khawpa a rawn invawrh chho a nih erawh chuan English midfielder tha ber zingah a inhlangkai thei ngei ang le.

Cristian Romero

Tottenham chuan an tlarhnung thuam tha turin Atalanta atangin £45m in Romero hi an lei a nih kha, amah duhtu hi Antonio Conte a ni a, rin lawk ang ngeiin Spurs tan player tangkai tak a ni nghal vat mai.

Serie A-ah khan defender tha ber zingah a hming a rawn chher hman, kum 24 mi chauh a la ni a, Spurs tlarhnung innghahna a rawn ni chho vat dawn. Season tir lamah inhliam mah se Spurs tan a theihna a lantir chhunzawm a. Premier League-ah game 4 inlan tawhin tunah hian table-ah pathumna an ni mek a, chak loh an la nei lo a, goal 18 thun tawhin goal 7 chiah an la chhuah.

Jules Kounde

Premier League lamah a kal dawn emaw tih laiin Barcelona chuan £45m-in an lei ta kha a ni a. Season tirah La Liga Salary Cap chungchang avangin an register lawk thei lo, transfer hun a zo a, Barcelona chuan an squad-ah an ziak lut ta a.

Barcelona tan league match 3 a khel tawh a, defender mah ni se assist vawi 2 a nei tawh bawk. A rawn che tha chho zel tura ngaih a ni a, Catalan club tlar hnung ti phuitu player tangkai tak a ni chho dawn niin a lang.

Gabriel Jesus

Europa League khel dawn mah se Arsenal chuan Brazil striker Gabriel Jesus hi £45m in an la lut thei ta tho a. Aubameyang leh Lacazette te hmun ruak chu a hnawhkhat tha kher mai.

Arsenal tan league-ah goal 4 khung tawhin assist vawi 3 a nei tawh bawk a, League hmahruaitu an ni mek a, tun season-ah vawi khat chiah chak loh an nei, a bak chu an chak vek. Goal 17 an khung tawh a, goal 7 chiah an la chhuah. Arsenal-in game hmuhnawm tak an khelh chhuah theih nana player tangkai tak a ni nghal a, transfer fuh tak a ni chiang e.

Lisandro Martinez

Ajax lamin chhuahtir an phal chiah lo, chutih laiin Erik Ten Hag khan an tlarhnung thawm that nan lak ngei a duh bawk si, £46.8m in an inlei ta nge nge a.

League game hmasa pahnihah United an tlawm, Premier League player sang tak tak karah chuan Lisandro hi a flop viau ring an tam hman hle, chutih laiin a taihmakna te, a huaisenna leh a thiamna te chu United-in an chhawr chho tan ta.

A tirah vawi hnih an chak loh bak kha an khingpui an hneh chho ta vek a, an hneh zingah hian Liverpool leh Arsenal an tel nghe nghe. Heng match pawimawh tak takah hian Lisandro hi player tangkai tak a ni a, Erik Ten Hag pawhin a chhawr tangkai tak zet a ni.

Raheem Sterling

Pep Guardiola-a'n chhawr la tum viau mah se regular taka a khelh theihna hmun a pan ta a nih kha, Chelsea chuan £47.5m in an lei, an hmatawngte hmun dangah an chhuahtir avangin Thomas Tuchel chuan central striker angin a chhawr, Chelsea tan league game hmasa 6 atangin goal 3 a khung nghal.

Hetih lai hian Aubameyang an la lut a, coach thar an nei chhunzawm bawk nen. Graham Potter chuan central-ah Aubameyang a chhawr a, wing lamah Sterling a tlantir ta zawk a. Potter-a game hmasa berah pawh goal a khung nghal pang bawk a, Blues tan player tangkai tak a ni chho dawn niin a lang.

Richarlison

Harry Kane, Heung-min Son leh Dejan Kulusevski te an inman hlawm hle, chutih laiin Antonio Conte chuan an hmatawng ti chak turin Brazilian striker Richarlison chu £52m in a la lut.

A tirah Conte chuan a chhawr nghal mai lo, bench atangin a luhtir fo. An game hnuhnung 4-ah erawh a start tir a, Richarlison hian goal 3 a khung nghal zawt mai.

Champions League-a Marseille an hmachhawn tum khan goal 2 a khung a, ball a chang emaw chang lo emaw, a thiante tan player tangkai tak a ni mek. Ani pawh hi transfer fuh tak zing ami a ni chho dawn niin a lang.

Phek khatah chuan kan content hi a thui dawn lutuk a, Part 2 kan rawn post leh dawn nia.