PFA Player of the Year lawmman chu official-a semchhuah a ni ta a, kan hriat tawh sa angin lawmman ngaihven hlawh ber PFA Player of the Year chu Liverpool defender Virgil Van Dijk hlan a ni a, Young Player of the Year chu Manchester City player Raheem Sterling hlan a ni bawk.
Kum 27 mi Van Dijk hian tun season-ah Liverpool tan Premier League game zawng zawng a la khel kim veka, clean-sheet 19 an nei tawh. Van Dijk hi kum 2004-05 season-ah John Terry-a’n he lawmman a dawn hnuah defender PFA Player of the Year ni leh thei hmasa ber a ni a, he lawmman dawng thei hi Van Dijk chhiar telin defender pathum chiah an la awm.
Nikum January thla khan Liverpool chuan khawvela defender manto ber ni turin Van Dijk hi Southampton atangin an laluta, a manah Reds hian pound maktaduai 75 lai an seng. Van Dijk an lakluh hnua Liverpool tlar hnung phui zia hian sawi a hlawh em em a, tun season-ah goal chhuah tlem ber niin vawi khat bak an la tlawm lo.
PFA Player of the Year lawmman dawng thei tur zingah Van Dijk bakah player panga dang thlanchhuah an ni a; Sadio Mane, Sergio Aguero, Raheem Sterling,Bernardo Silva leh Eden Hazard-te hmakhalhin Netherlands captain hian he lawmman hi a dawng a ni.
PFA POTY dawng tura Van Dijk-a elpui ber leh buk rit bera ngaih Sterling chuan PFA Young Player of the Year lawmman a dawng ve thung a, kum 24 mi hian tun Premier League season kal mekah game 31 khel tawhin goal 17 a khung tawh a, assist 10 a nei tawh bawk.
PFA Young Player of the Year lawmman dawng thei tur hian Sterling bakah City player dang Bernardo Silva pawh a tel a, anni bakah hian Liverpool defender Trent Alexander-Arnold, Manchester United forward Marcus Rashford, West Ham midfielder Declan Rice leh Bournemouth player David Brooks-te pawh an tel a ni.
Hmeichhe lam lawmman pawh sem a ni a, PFA Women’s Player of the Year atan Arsenal forward kum 22 mi Vivianne Miedema chu thlan a ni. Gunners hmeichhe team hian kum 2012 hnuah a vawi khat nan league title an la leh a, tun Sunday liamta khan champion in Miedema hian tun season-ah goal 22 a khunga a tawhhlawk hle.
Hmeichhe lam Young Player of the Year lawmman hi Manchester City player Georgia Stanway-i hnena hlan a ni bawka, he lawmman dawng thei zingah Miedema pawh tel mahse City player kum 20 hi hlan a ni ta zawk a ni.
