Footballer pathum - Pepe Reina, Paolo Cannavaro leh Salvatore Aronica te chu mafia te nen inkungkaih anga ngaih theih an nih avangin Italian Football Federation (FIGC) te chuan hemi chungchangah hian insawifiah turin an ti.

Naples khuaa anti-mafia department chuan hemi chungchang hi an chhui zui dawn a, FIGC chief prosecutor Giuseppe Pecoraro chuan player pathum te chu disciplinary committee hmaa inlan turin a hriattir tawh a, a hun erawh an la tifel lo thung.

Cannavaro leh Aronica te hian kum eng emaw zat chu Napoli-ah an khel thin a, Liverpool goalkeeper hlui Reina hian kumin transfer window hawn hunah Napoli chhuahsanin AC Milan a pan dawn a ni.

Reina, Cannavaro leh Aronica te hi Esposito unau - Gabriele, Francesco leh Giuseppe te nen inzawmna nei nia ngaih an ni a, heng Esposito unau ho hi Naples khuaa Caorra mafia hotute an ni.

Kum 35-a upa Reina hian Naples khawpuia night club lar tak pakhat, Esposito unaute taah inthlahna hun a huaihawt niin Gazzetta Dello Sport chuan a tarlang a. Hei bakah hian Reina leh Cannavaro te chuan Esposito unau pahnih te tan a thlawna Napoli inkhel en theihna ticket an nei niin an sawi bawk a. FIGC aiawhte chuan club pathum - Napoli, Sassuolo leh Palermo aiawhte chu thu an zawt fiah tel bawk ang.

Napoli team kaihhnawih mi pathum, manager Paolo De Matteis leh ticket lampang buaipuitu lu ber ni thin Luigi Cassano te pawh FIGC hmaah hian an inlan a ngai dawn bawk a ni.

Nikum December thlaa football chawlhsan, kum 36-a upa Cannavaro hian a unaupa, 2006 World Cup winner Fabio Cannavaro chu Chinese Super League club Guangzhou Evergrande enkawl turin a zui a ni.

Reina hi 2010 World Cup-a Spain an champion khan a tel a, 2008 leh 2012 te khan European Champion niin, 2013 khan Liverpool atangin loan in Napoli hi a zawm tan a.

2014 khan Bayern Munich a zawm a, 2015 ah Naples khaw lam a pan nawn leh a. Club lamah chuan Liverpool kha UEFA Super Cup, FA Cup leh League Cup a lakpui a, Bayern Munich chu Bundesliga title a lakpui a, Italian Cup pawh vawi khat chu a la tawh bawk.