Inrinni zan khan Manchester City chuan West Ham an hmachhawn a, 3-1 in mikhual team-in hnehna an chang a, Erling Haaland chuan hattrick a siam leh ta a ni.

London Stadium-a an inkhelh hma chiah match-ah Haaland hian Ipswich Town lakah hattrick a siam bawk a, a zawnin hattrick a siam ta. Premier League-ah hian a zawna hattrick siam thei player pahnih chiah an awn a, Harry Kane leh Haaland te niin, anni pahnih hian tum hnih ve ve a zawnin hattrick an siam tawh a ni.

A career-ah Erling hian ram leh club tan hattrick vawi 24 a siam ta a, Manchester City tan hattrick vawi 11 siam tawhin, Premier League-ah hattrick vawi 8 a siam ta bawk. Borussia Dortmund atanga Manchester City a pan hnuin, Manchester club tan hian Haaland hian Premier League game 69 atangin goal 70 a khung tling der tawh.

"Ka taksa pawh a that lai ber a ni, thahrui ka ngah lai a ni a, chawlh rei tak ka hmang a, pre-season tha takin ka hmang bawk a, goal khung turin ka inpeih at reng a ni," tiin Hammers an hmachhawn zawhah Haaland chuan a sawi.

Premier League season khat chhunga goal 36 a khung tum khan a ropui hle a nih kha. Chutih laiin tun season chu game tir pathum atangin Haaland hian goal 7 a khung tling der tawh, bul a tan tha tak zet a ni.

"Haaland-a chungchangah chuan sawi tur ka hre lo, a mak a ni. Tuna kan tum ber chu, a hma zawng aia tha zawka khel tura buatsaih a ni a, box chhungah ball tam zawk pek zel kan tum. Chu chu kan thupui ber a ni mek e," tiin Manchester City boss Pep Guardiola chuan a sawi.

"Goal thum a khung a, chutih laiin ka lo ngaihven zawk chu, ball a hloh miah lo kha a ni. West Ham kan hmachhawn tum kha a khelh that ber tum niin ka hria, a chhan chu kawng engkimah a khel tha tlat a ni.

"Game khelh dan tur kan duang a, chu chu a ti thei zel, a chhan chu player fing tak a ni," tiin Guardiola chuan a sawi bawk. Man City defender hlui Micah Richards pawhin, "Nipui chawlh tha taka a hmang kha a chhawr tangkai hle. Thahrui a ngah a, a taksa chet dan atang pawhin a hriat theih a ni," tiin a sawi ve bawk.