Pathianni zan khan Real Madrid chuan Girona an mikhual a, team hnihte 1-1 in an inhnehtawk. Inkhelh zawhah Real Madrid boss Carlo Ancelotti a lungawi lo hle, referee chuan penalty pek dan thar a hmuh chhuah thu a sawi nghe nghe.

Real Madrid hian an khingpui hi hmachhawn harsa an ti ve hle, first half-ah goal a lut lo a, second half minute 70-ah box dinglam sir atanga Valverde cross chu Vinicius Junior chuan a tlawh goal. He goal a luh atanga minute 10-ah Girona chuan penalty hmangin an siphurh an rul ve.

Box chhungah Asensio chu a handball tiin referee Mario Melero Lopez chuan VAR a rawn, penalty a ham ta nge nge, Stuani chuan he penalty hi goal-ah a chantir. Hun tawp dawn tak takah Toni Kroos chuan yellow card vawi hnihna a chawi avangin hnawhchhuah a ni chhunzawm bawk a, team hnihte 1-1 in an inhnehtawk ta a ni.

He match-ah hian goal hlauhawm a tam lem lo, Rodrygo chuan Girona goal post a pet per a, Yangel Herrera pawhin pen 16 vel atangin Real Madrid goal bar a pet per bawk. Hun tawp dawn tak takah Girona goalkeeper Gazzaniga ball man beh nghet lo tak chu Rodrygo chuan a chhuih goal, mahse referee chuan foul a ham bawk a ni.

Asensio penalty chawi dan khan sawi zui a hlawh hle. Ball khan a awmah a per hmasa a, chumi zawhah a kut dinglam pangbet-a a dah chu a per chhunzawm. A kut veilam khan ball a tawk niin referee khan a ngai a, penalty a ham ta a ni.

Inkhelh zawhah Real Madrid boss Carlo Ancelotti chuan, "Hetiang hi ka sawi ka sawi ve duh lem lo, vawiin erawh ka sawi dawn. Asensio kha a handball lo chiang kuang a ni.

"Asensio pawh ka bia, ball khan a awm a per a, a kut veilam kha a phar, a hmai a veng mai chauh a ni. A kut veilamin ball a tawh leh tawh loh kha hriatthiam a har pawh a ni mahna, chutih laiin a kut veilam khan ball a tawk lo a ni, referee khan penalty pek dan thar a hmuchhuak a ni ber mai.

"Rodrygo goal pawm sak a nih loh chungchangah kha chuan ngaihdan chi hnih a awm thei ang. Goalkeeper khan ball kha a thunun tawh a nih chuan sawi theih ka nei lo," tiin a sawi.

Point 3 an hlawhchhuak dawn emaw an intih laiin point 1 chiah an hlawhchhuak ta si a. Khelh 12 atangin point 32 an hlawhchhuak, Barcelona nen a hmaa point 3-a inthlau kha game 12 an khelh tlin chuan an inkar chu point 1 chiah a ni ta.