Barcelona lamin chawlh pek tum mahse Spaniard midfielder Pedri chuan chawlh hman a duh lova, tunkar hian Barcelona-ah training a zawm leh nghal dawn.

Pedri hian season liamta a tawp hnuah chawlh a la nei lova, Euro 2020-ah Spain tan a fehchhuaka, Euro 2020 a zawh hnu lawkah Olympic khel turin Spain tan a fehchhuak zui leh nghal.

Euro 2020-ah khan Spain hian semi-final an thlenga, Tokyo Olympics khelh zawh takah khan final an lut leh bawka, Euro leh Olympic-ah Pedri hi Spain tana khel rim ber zinga mi a ni ve ve.

2020-21 season intan atangin kum 18 mi Pedri hian game 73 ngawt a khel tawha, chawlh nei lovin season thar a ban tlang dawn a ni bera, tha za rual a ni bawk a in fit zak zak hle.

Spanish chanchinbu mite tarlan danin, Barcelona manager Ronald Koeman chuan Pedri hi chawlh a pek a tuma, mahse Pedri hian a hnar a ni.

Pedri hi Las Palmas academy chhuak a ni a, kum 2019-2020 season khan Las Palmas senior team lama a khelh hnuah nikum khan Barcelona-in an leia, a manah Barcelona hian a tirah euro maktaduai 5 vel bak an seng lo.

Spain U17, U18, U19, U21 leh U23 tan te a khelh hnuah kumin atang khan Spain senior team lamah Pedri hi koh a ni tana, Spain senior team tan hian game 10 a khel tling der tawh a ni.