International break laia a thil tawn chu duhawm loh viau mah se, Kylian Mbappe a hlim hle a, football chauh a ngaihtuah niin Real Madrid boss Carlo Ancelotti chuan a sawi.

Pawngsualtu nia puh chungchang hi Swedish media Aftonbladet chuan a tarlang hmasa ber a, Stockholm police te chuan Mbappe chungchang hi an chhui zui nghal a, kar hmasa lama a thiante nena an thlenna hotel pawh police te chuan ngun takin an dap kual bawk.

In pawngsualna hi central Stockholm-a hotel pakhatah a thleng tih puhtute chuan thawhlehni khan an puang a, The Aftonbladet-in a tarlan dan chuan, pawngsual thubuai ziak luhtute hian he thil hi inrinnia thleng niin an tarlang a, police te chuan thawhtanni khan hotel an luhchilh bawk.

He puhna hi Mbappe chuan a pha nasa hle a, a tir chuan thu lengvak mai mai niin a ngai a, mahse media lamin an chhuah tak nasat hnuah erawh hrehawm a ti ve niin The Athletic chuan a tarlang.

Hetih lai hian Real Madrid boss Carlo Ancelotti chuan, Mbappe nungchangah danglamna a awm loh thu leh, hlim taka training a neih thu a sawi ve mek.

"Ka player te hi ni tin ka bia a, Mbappe chungchangah chuan, titi lengvak mai mai a ni rih a, training a neihnaah pawh a hlim em em, kha chanchinthar khan amahah nghawng a nei lo.

"International break laiin chawlh a hmang a, a hliam pawh a dam tawh hle. A hlim a, naktuk match-ah pawh kan player tangkai tur a ni.

"Taksa leh rilru lamah pawh 100 percent-in a fit tep tawh, training a nei tha a, training-naa a chetla hmuh a nuam em em bawk," tiin Carlo Ancelotti chuan a sawi.

Real Madrid hian inrinni zan zanlaiah Celta Vigo an tlawh dawn a, hetah hian Mbappe pawh an chhawr ngei dawn niin a lang bawk.