Everton chuan midfielder Amadou Onana chunga chi inthliarna thleng chu an duh loh zia an lantir. 

Amadou Onana hian social media lamah chi inthliarna lam rawngkaia bawlhhlawh taka beih a tawk a, Everton chuan an duh loh zia tarlangin thil tisualtu an man vat tur thu an tarlang bawk.

Premier League club chuan thawhtanni khan thuchhuah an siam a, Toffees leh police tangkawp chuan theihtawpa hma lak an tum thu an tarlang.

"Everton chuan kan player-te chunga chi inthliarna leh inthliarhranna lam rawngkai hrim hrim thleng hi kan en liam mai mai dawn lo a, kan thil duh loh ber a ni.

"Amadou Onana sawichhe zawnga racist post kan hmuh avang hian kan rilru a na a, a nunrawn thlak em avangin kan tuar dam mai mai lo ang.

"Police-in theihtawp chhuahin an chhui chiang mek a, misual man a nih ngei theih nan club pawhin kan theihtawpin kan pui ve ang.

"Social media platform-te leh thuneitute pawh kan dem a, racism hian social media leh khawtlangah hmun a chang tur a ni lo,"tiin Everton thuchhuah chuan a tarlang.