Olympic-a lo tel tawh Susen Tiedtke chuan Olympic Village-ah infiammi ten mipat hmeichhiatna an hman nasat thin thu a sawi chhuak.

Tokyo Olympics erawh covid lai a ni a, social distancing ngaih pawimawh lai a nih avangin infiammite zingah mipat hmeichhiatna a hluar lo nia report a ni.

Covid a reh a, Paris-ah Olympics neih mek a ni a, eng nge an an dawn tih erawh sawi lawk theih a ni lo.

Infiammi fit tak tak an fuan khawm a, Olympics village-ah an awm khawm a, hetah hian zahpah nei miah loin an khawsa thin nia report a ni.

1980 Olympics atang han condom sem thin a ni a, Rio-a 2016 Olympics neih a nih tum khan condom 450,000 lai sem a ni a, mi pakhatin condoms 40 zel dawng ang an ni.

Olympics-a tel tawh long jumper Susen Tiedtke chuan, "Olympic-a mipat hmeichhiatna hman hi pumpelh theih loh tluk a ni.

"Infiammite chu an fit vanglai tak a ni a, intihsiakna a zo a, an thahrui te hahdamtir an duh thin.

"Kan coach khan, 'intihsiakna neih hmain mipat hmeichhiatna hman loh tur, taksa tihchak a ngai leh thin a, a buaithlak,' tiin min hrilh hial.

"Intihsiakna a zo a, hlim takin room party te kan nei a, thenkhatin mipat hmeichhiatna an hmang bawk a, muthilh a har thin hle," tiin Bild-in an kawmnaah a sawi.

Mipat hmeichhiatna lama mithiam Tammy Nelson chuan, "Infiammite an fit em em a, intihsiak chhungin rilru hah em emin an awm bawk nen. Intihsiakna a zawh meuh chuan hahdamna an zawng ta thin a ni. Chutah chuan mipat hmeichhiatna hi pumpelh theih loh khawpa thil lo kal nghal a ni thin," tiin a sawi ve bawk.