Ruben Amorim chuan a vawi khat nan Old Trafford-ah Premier League boruak a tem a, 4-0 laiin Everton an sawp a, United supporter-te thawm a tha hem hem, an boss thar hian nuam a ti thlawt.

"Fans lamin min pui nasa kher mai. Hetiang hi a nih zel dawn chuan a nuam dawn khawp mai. 

"Kan game kha chu duhthu a sam chiah lo, goal erawh kan veng tha thawkhat. Hun chu kan la mamawh deuh dawn a ni.

"Kan fan ten thawkrim turin min duh a, football hmuhnawm zawk khel turin min phut tlat bawk.

"Old Trafford boruak hi ka lo suangtuah ve tawh thin, ka beisei phak bak a ni a, ka dam chhungin ka hre reng tawh ang.

"Inkhelh tan hma atangin supporter te an zai tawh, an hla sak thu thenkhat kha chu ka hre ve nual, nuam ka ti thlawt.

"Game kan han khel tan a, player te nen theihtawp chhuah kan duh a, chak kan duh. He hmunah hian hun rei tak cham a, an hla sak kha ngaihthlak reng ka duh a ni," tiin Ruben Amorim chuan Everton an hneh zawhah a sawi.