Inrinni zan Premier League inkhelah Manchester United chuan Bournemouth an lo mikhual a, si thum faiin United hi an mualah an tlawm a Cherries-in point 3 hlu tak an hlawhchhuak.

Old Trafford-ah hian Dominic Solanke, Philip Billing leh Marcos Senesi te chuan mikhual lam tan goal khat theuh an khung a ni.

Khelh 16 atangin United hian point 27 hlawhchhuak tawhin parukna dinhmun an luah mek a, Bournemouth hian khelh 16 ah point 19 neiin, 13-naah an awm mek thung.

Inkhelh an tan atanga minute chuang awrh an khelhin United in goal an chhuah nghal a, United hian an defensive third-ah ball hlohin, box pawn dinglam atangin Cherries midfielder Lewis Cook chuan ball a cross a, hei hi Solanke chuan goal-ah lo chan tirin, si khat faiin Bournemouth in hma an hruai.

First half-ah goal khat bak a lut lova, 68mins-ah Bournemouth hian an goal hnihna an thun. Solanke chuan midfield atangin final third-ah ball a khalh lut a, a dinglama awm Tavernier pe in, Tavernier hian tha takin box-ah ball a vawrh lut. Hei hi Billing chuan lo tauh lutin, 2-0 a ni.

Minute nga hnu velah Bournemouth hian goal an thun belh leh a, corner atanga ball vawrh luh chu Senesi chuan goal-ah lo tauh lutin, si thum faiin Bournmouth hian Old Trafford-ah hnehna pawimawh tak an chang a ni.