Nottingham Forest chuan an head coach Nuno Espirito Santo an ban a, a aiawh turin min dang an zawng mek a, Tottenham manager hlui Ange Postecoglou chu an ngaihven mek nia report a ni.

Nuno hian Forest hi thla 21 chhung a enkawl a, Europe-a inlan thei turin season hmasa khan a kaihruai. Thla hmasa khan club neitu Evangelos Marinakis nen an kar thu a chhe deuh niin Nuno hian a sawi a, an inban chhunzawm ta nge nge a ni.

Forest chuan Nuno an thlah a, club tana a thawhrah tam tak chu an hriat reng tur thu leh, an thinlunga a cham reng tawh tur thu an tarlang. Kum 51 mi hian kum 2023 December thla khan Steve Cooper a thlak a, 1994-95 season hnua an tawn san ber a thlenpui a, league-ah 7-na a nihpui.

Kumin June thla khan kum 3 daih contract a ziak thar leh  a, hetih lai hian home game-ah 3-0 in West Ham an hneh lo a, table-ah 10-na an ni mek a, transfer chungchanga a lungawi loh avangin Nuno hi club hotute nen an inchhang deuh nge? Tunah chuan an inṭhen ta a ni.

August thla khan Nuno chuan a hna a him loh thu a lo sawi tawh a nih kha. Transfer chungchangah club chhungkuaah buaina a awm niin BBC chuan a tarlang a, Nuno chuan tun nipui bazara an hotute chet dan chu a dem a, an che muang lutuk niin a ngai.

Edu cho Forest Global head of football atan an ruat a, ani hian player transfer chungchang pawh a buaipui ber.

"Club hotute nen kan inkar a ṭha em em ṭhin, season hmasa phei kha chuan ni tin hian kan indawr a, duhthusamin hun hmang lo mah ila kan inkar thu a ṭha em em.

"Chutih laiin club hotute nen kan inkar a kak zau tial tial a, he club chhunga tu pawh hi inpumkhat tur kan nih laiin, a takah erawh a theih si loh a ni," tiin Nuno khan a sawi a nih kha.

Tun nipui bazarah palyer 13 an lei a, £196m vel sum an seng nia report a ni. Hetih lai hian Anthony Elanga, Danilo leh Wayne Hennessey te chu an player chhuahtir zinga langsar an ni. A duh dan ang ni loin transfer bazarah club hotute an che niin a lang a, hei vang hian Nuno pawh a lawm lo a, hotute nen an inkar a chat ta a ni.