Darwin Nunez chungchangah Liverpool leh Saudi Pro League Club Al-Hilal te chu an inrem ta niin The Athletic chuan a tarlang.

Nunez manah hian Al Hilal chuan €53million bakah add-ons an thehchhuak a, hei hi Liverpool chuan a thuphungin an lo pawm ta a ni.

Inremna tluantling erawh a la awm lo deuh nia report a ni a, club pahnih pawhin thuchhuah an la siam lo ve ve bawk.

Liverpool hian an striker kum 26 mi hi Saudi lam pan an phalsak tawh a, Nunez hian chhuah a duh nge duh lo tih chungchang erawh tarlan a ni lo thung.

Italian Club AC Milan pawhin Uruguay international hi lak an duh, mahse sum chungchangah Liverpool chhiar zat an tlin loh avangin an inhnukdawk leh a ni.

Liverpool hian Wirtz leh Ekitike te an nei tawh a, Isak lak an la tum chhunzawm reng bawk a, heng te a nih avang hian Darwin Nunez-a tan hmun a awm dawn lo niin a lang.

Kum 26 mi Nunez hi Simone Inzaghi chuan a duh hle nia report a ni nghe nghe. Nunez hian kum 2022 khan Benfica atangin Liverpool a zawm a, a man kha €100million (£85m) vel nia report a ni.

Liverpool tan season liamta khan competition hrang hrangah game 47 a khel a, goal 7 a khung. Premier League-ah erawh vawi 8 chiah inhelh bul a tan a ni.