Nuno Espirito Santo an ban hnuah Nottingham Forest chuan Tottenham manager duh tawh loh Ange Postecoglou an la lut dawn niin BBC chuan a tarlang.

Thawhtanni zan khan Forest chuan Nuno an ban a, hemi hnu hian hmanhmawh takin Ange Postecoglou an be chhunzawm nghal. Kum 60 mi Postecoglou chu Forest manager thar ni tura biak mek a nih thu BBC chuan a tarlang a ni.

Season hmasa zawh rual khan Tottenham chuan Postecoglou an ban a, kum tam tak hnuah trophy a chawipui a, Europa League final-ah Manchester United an hneh. Mahse Premier League-ah erawh 17-na an nih avangin Spurs chuan Postecoglou an ban ta tho tho a ni.

Tun season Premier League game 3 khelh tawhah Forest chu 10-na an ni mek a, thla 21 City Ground-a hun a hman hnuah, transfer chungchanga inhmuh thiam lohna an neih avangin Forest chuan an manager Nuno an ban a, tun Pathianni hian Forest chuan Arsenal an tlawh dawn a, hemi hma ngei hian manager thar lak luh hman an tum dawn a ni.