Premier League kaithar Nottingham Forest chuan Manchester United goalkeeper Dean Henderson chu an dawr niin 90min chuan a tarlang.

David de Gea a nek chhuah theih loh avangin English goalkeeper hian, kumin nipui bazar inhawn chhunga Old Trafford chhuahsan a duh a, United hotu te hnenah pawh hian a chhuah duh thu a thlen tawh nia sawi a ni.

United hian De Gea chu contract thar ziahpui an tum a, Henderson hi a phu tawka dawrtu an awm a nih chuan an hralh phal bawk niin chanchinbu mite chuan an tarlang.

Sheffield United lamah season hnih chhung loan-a a khelh chhungin Henderson hi a khelh that em avangin, kum 2020 khan United chuan kum nga daih contract an ziahpui a, mahse kum 25 mi hian inkhelhna hmun a chang zui thei meuh lo.

Championship club pahnih Middlesbrough leh Sunderland te pawhin Henderson hi dawr mah se, Henderson hian Premier League-a awm a duh avangin Forest lam hi a awn viau nia sawi a ni a, Newcastle pawhin dawr zet mah se, anni erawh an inhnukdawk tawh a ni.