Ruben Amorim chuan November ni 11, 2024 khan Carrington a thleng a, United a luh hnu rei loteah Ruud van Nistelrooy chu a chhuak ve chhunzawm nghal bawk.

October ni 28 khan Erik ten Hag ban a ni a, coach nghet an neih hma chu Nistelrooy hian United team a enkawl.

Game 4 a khelhpui a, vawi 3 hnehna chanpuiin, vawi khat an inhnehtawk a. Pathianni zan khan si thum faiin Leicester City an hneh a, kha match kha Nistelrooy-a tan chuan United team a enkawl hnuhnun ber a ni ta a ni.

November ni 1 khan Ruben Amorim chuan United boss atana sawmna a pawm, mahse Sporting team a enkawl leh zuai a, United tana a game hmasa ber chu November ni 24-ah a khel dawn a, chutah chuan Ipswich Town a hmachhawn dawn a ni.

Amorim hian coaching staff tu te nge a hruai luh dawn tih a la sawi theih loh a, mahse Nistelrooy erawh chuan Old Trafford a chhuahsan ta a ni.

Ruud hian United team-a la awm zel a duh thu interim manager a nih lai khan a sawi a nih kha. 

Ruben Amorim pawhin, "United legend chungchangah chuan, hna ropui tak a thawk a ni. Kan inkawm ang a, chumi hnuah engkim a chiang dawn a ni," tiin a sawi ve bawk.

Carrington-ah an inbe ta ngei niin a lang a, mahse Amorim leh Nistelrooy te hi an thawk dun dawn ta lo a ni.

Manchester United chuan, "Ruud hi Manchester United legend a ni reng tawh ang. Kan club tana a hnathawhah kan lawm em em a, Old Trafford-ah engtik lai pawhin kan lo lawm reng dawn a ni," tiin thuchhuah an siam.

Nistelrooy-a rual hian coaching staff Rene Hake, Jelle ten Rouwelaar leh Pieter Morel te pawh an chhuak ve nghal bawk a ni.

Nistelrooy hian Dutch club PSV a enkawl thin a, tun nipui bazarah khan Erik ten Hag-a assistant niin Old Trafford a pan. United a pan hma hian Burnley lam pawhin an sawm nghe nghe.

Netherlands international hlui hi United-ah kum 2001 atanga 2006 chhung khan a khel a, game 219 atangin goal 150 a khung a, Real Madrid, Hamburg leh Malaga-ah te a kal kual leh bawk a ni.