Nico Williams chuan Barcelona pan a duh thu a khelhna club Athletic Club a hrilh niin The Athletic chuan a tarlang.

Kar hmasa khan Barcelona leh Williams te hi mimal thilah an inrem tawh nia report a ni a, Nico hian release clause €60million (£50m, $62m)  a nei a, hei hi Barcelona chuan an pek theih mai an inring nia tarlan a ni bawk.

Kum 22 mi Nico Williams hi Barcelona mai ni lo, Bayern Munich, Arsenal, Chelsea, PSG leh Liverpool te pawhin an ngaihven nia tarlan a ni.

Nikum khan Barcelona leh Nico Williams te hi sawi zawm an lo ni tawh a, hetih lai hian Athletic Club president Jon Uriarte chuan an player tha chelh thei turin sum lamah an hnianghnar tawk thu a sawi a nih kha.

La Liga Salary Cap chungchangah Barcelona hian Williams hi la thei dawn niin an inngai a, hetih lai hian La Liga President Javier Tebas chuan Barca chu an sum lak luh an tihsan leh deuh a la ngaih thu kar hmasa khan a sawi.

Williams hi Athletic Academy chhuak a ni a, kum 18 a nihin senior team-ah a inlan tan. Kum 2020 April thla khan a debut game khelin, Athletic tan hian game 167 a khel tawh a, goal 31 khung tawhin, assist vawi 30 a nei tawh bawk.

Spain National team-ah kum 2022 September thla khan a inlan a, Barcelona player pawimawh Lamine Yamal nen 2024 European Championship-ah inlanin, no mawi an chawi nghe nghe a nih kha.