Champions League round of 16-a pet chhuah an nih danah Paris Saint-Germain forward Neymar a thinrim hle a, referee-te duhthawh takin a sawisel.

PSG tlak dan hi kan hre vek tawhin a rinawm a, hemi chungchangah Neymar chuan referee-te chu engmah hrelo an nih thu leh Presnel Kimpembe chu a handball loh thu te a sawi.

Kum 27 Neymar chuan, “A hnungzang a fuha, engtin nge handball a nih theih. A zahthlak hle in ka hria a, VAR-a ennawn turin mi pali football chungchang hre miah lo an dah. Penalty a ni lo,” a ti.

Neymar hi a inhliam avangin a khel thei lova, first leg-a 2-0 a an chak tum pawhin a inlan thei lo tawh. Diogo Dalot-a ball pet chuan Kimpembe-a ban a fuh ngei nia a lan avangin referee chuan corner a pek zet hnuah United lam chu penalty a pe leh hnuhnawh a, United hian penalty spot atang hian an khung zuia, away goal an ngah zawk avangin away goal rule hmangin Quarter-final an lut ta a ni.

He inkhelah hian PSG lam an hriam tawk lo hle a, an inthlahdah pawh a tih theih awm e. Tihsual an neihin chak tumna nei ruh tak Manchester United lamin an tihsual man an tel tir nghal zel. United an fakawm hle a, an player pawimawh tam tak khel thei lo mahse PSG an lehthala, Champions League-a thil thleng tam lo tak an thlen tir.

PSG manager Thomas Tuchel pawhin penalty tur nia a hriat loh thu a sawi ve bawka, mahse VAR a la thlawp reng thu a sawi tel bawk.