Neymar agent-te chuan chhuahna tur club dang an zawng mek a, Premier League club Manchester United hnenah an zuar niin Sky Sports leh French chanchinbute chuan an tarlang.

Paris Saint-Germain chuan Brazilian forward hi kumin nipui bazar inhawn huna hralh an duh a, a agent-te hian Manchester United bakah hian club dang engemaw zat hnenah an zuar niin an sawi. United hian lakluh an tum zingah dah tel lo mahse, sumdawnna kawngan hlawkpui thei dawn tih an hria a, player chhia anih loh bawk avangin an in ngaihtuah nawn maithei.

Chelsea pawhin Neymar hi an duh tih thawm a awm a, season thara Champions League an khelh dawn loh avangin an thlemluh theih a beiseiawm loh. PSG hian Argentine forward Lionel Messi pawh an chelh dawn lova, Neymar a chhuak bawk anih chuan Kylian Mbappe an chelh a rinawm.

Ligue 1 club leh United hian indawrna an la nei lo niin Fabrizio Romano chuan a ziak a, Old Trafford pan lo pawh nise a chhuah tho chu a rinawm. Kum 31 mi hian 2017 Thitin thla khan Barcelona chhuahsanin Parc des Princes a pan a, €222m man niin khawvela footballer manto ber a ni.

France-a a awm chhungin Ligue 1-ah vawi li an champion tawh a, French Cup leh French Super Cup-ah te vawi thum ve ve an champion tawh bawk. Neymar hian ke rek hliam vangin chawlh a hmang mek a, Ramtuk thlaa inhliam kha niin tun season-ah a inkhel thei tawh dawn lo.

2025 Nikir thla thleng daih contract ala nei a, sapram chanchinbute chuan a hmang zo dawn lo niin a sawi. United lei tumtu zinga ami Sheikh Jassim bin Hammad al Thani chuan Barcelona forward hlui hi lei a duh niin an sawi a, PSG-a a hlawh ang zat pek a inhuam niin thuthang a awm a ni.