A thiam, a inkhel a hmuhnawm em em. Mahse a inhliam nasa lutuk a, duh a thlang sual bawk nen, Neymar chu kum 32 mi lek niin a football hun hnuhnung lam a hmang chho ta mek.
Neymar leh Saudi Pro League club Al Hilal te chu inhriatthiam tawnna hmangin an inṭha ṭhen. February ni 5 hian Neymar hian kum 33 a tling dawn a, Al Hilal-ah hian a contract tawpna a hmang mek bawk a, tunah chuan free agent a ni ta a ni.
Al Hilal chuan Neymar-a chungah lawmthu an sawi a, a kal zelna turah duhsakna an hlan bawk. Kum 2023 nipui lai khan PSG atangin Neymar hian £80million ($102m)-in Al Hilal hi a pan a, mahse hliam a ngah em avangin Saudi club tan hian vawi 7 chiah a inlan thei.
Kum 2023 khan a khup a tihliam a, Copa America 2024 pawh a khel thei lo. Kum 2024 October thla khan lo kir lehin, hetah hian hamstring hliam avangin a chawl leh bawk. Al Hilal tana a khelh hnuhnun ber chu, nikum November ni 4 kha niin, Esteghlal FC a hmachhawn a ni.
Neymar hi club hrang hrang nen sawi zawm ni mah se, a chawrchhuahna club Santos a pan a rinawm hle. Kum 2013 nipui lai khan Barcelona a zawm a, hetah hian ropui takin a khel. Barca tan game 225 aṭangin goal 136 a khung a, assist vawi 64 a nei bawk.
Inter Miami lam pan pawh Neymar hian a chak hle, Messi leh Suarez te kianga khelh leh chu a chak. Hetih lai hian a hlawh chungchangah Inter Miami lamin lak an zuam lo deuh a ni.
Barcelona-ah khan khelh chhunzawm zel se, Messi leh Suarez te nen khan hun rei tak chhung chu European football an thunun theih a rinawm. Mahse Messi-a thlazar hnuaia khelh reng ai chuan PSG a pan ta a nih kha.
PSG khan €222 million lai sengin an la lut, kha transfer record kha vawiin thlengin khum thei an la awm lo. PSG tan Ligue 1 title la nawn awn awn mah se, Champions League lamah an che ropui thei lo. Barcelona-ah khan la cham chhunzawm zel selang chuan Ballon d'Or hial pawh a dawn a rinawm a ni.
Player talent nei ṭha tak a ni a, club lian takah cham chhunzawm zel selang chuan hetiang hian a career a zuih a rinawm chiah loh. Mahse a vanduai em a, a inhliam nasa a, hei hian a thlen tur ang a thlentir thei lo niin a ngaih theih bawk.
A inkhel a hmuhnawm a, kum 32 chauh a la ni bawk. Dam ṭha selang chuan Europe vela la chetla atan a awhawm hle. Mahse tunah chuan Brazil lamah a hun hnuhnung a hmang dawn ta niin a lang mek.