Next G leh Mizoram Esports Organization tangkawp buatsaih NEXT G LAN EVENTS SEASON TWO BGMI tournament chu January ni 13 zan khan R. Dengthuama Hall, Mualpui, Aizawlah zawh fel a ni a, he tournament hi Lan Events-a khelh niin Champion thei tura rinkai ber Team Flick(Rip Mizo Gaming) te chuan overall points 135 an hlawhchhuak a, Champion nomawi bakah pawisa fai cheng nuai khat an dawng ta a ni.
Next G Lan Events tournament final hi ni hnih khelh niin, technical problem hrang hrang avangin a nikhatna hi online-a khelh a ni. Hetih lai hian team thenkhat erawh chuan a hmun R. Dengthuama Hall atangin an khel bawk. He tournament-a pawisa an sem chhuah zawng zawng hi BGMI bikah hian cheng nuai 2 lai a ni a. Final day 2 leh a tawp zanah a hmun a entu an thahnem hle.
He tournament-a champion team - Team Flick te hian final-ah ngelnghet takin an khel a, team dang tan chuan an level a la sang deuh tih a lang chiang hle. Anmahni hnaih bertu aiin points 29 laiin an sang fal a, phu takin champion nomawi hi an chawi ta a ni.
Champion team IGL Lalbiakzuala Pachuau (Flick Yt) chu Best IGL a thlan niin, a teammate Nirvana chu Most Valuable Player (MVP) atan thlan a ni bawk. Next G Champion team – Team Flick te line up dang tho MSSC ESPORTS RISING CUP 2023 nomawi kawl tu Rip Mizo te pawh Palina niin, anni hian cheng singkhat an hum haw ve bawk a ni.
Rip Mizo Gaming Family-te chuan an fans Red Army-te chungah an tawiawmna zawng zawng avangin thinlung takin lawmthu an sawi a. Anmahni avanga tun dinhmun thleng hi an nih tih an inhriat thu leh kawng engkimah Red Army te support-na an la mamawh zel tur thu inkhel.com an hrilh.
Mizoram e-Sports hmanga vawi tam tak lo tihming tha tawhtu Bz-a Pachuau(Flick Yt) chu Next G Lan Events tournament ah Best IGL atan thlan niin, Bz-a hi Mizoram a BGMI player zingah chuan achievement ngah ber leh sulsutu hmasa ber pawl a ni a, amah avang hian India rama team lian dang ten Mizoram an lo hmelhriat phah tawh bawk a ni.
Bz-a hi a bul tan tirh chuan mi dawr a in hlawh chawp leh khawilaia mi wifi ring chunga khel chho a ni ve a, tunah chuan Mizoram mai nilo NorthEast India PUBG/BGMI tournament awm zawng zawng deuh thawah hlawhtlinna chang chho tawhin, a hlawhtlinna chan zawng zawng hi ziah vek sen pawh a ni tawh lo a ni.