Newcastle United chuan a vawi hnih nan Jorgen Strand Larsen  chungchanga Wolves an dawr leh a, £55million an thehchhuak. Hei hi Wolves chuan an lo hnawl leh niin The Athletic chuan a tarlang.

An indawrna hmasa zawkah Newcastle hian £50million an thehchhuak a, hnar an ni phawt a, a vawi hnihna pawh Wolves chuan an lo hnar leh a ni.

Wolves hian an striker Jorgen Strand hi hralh an tum lo bur, transfer window a inkhar tep tawh, tuna an hralh chuan striker dang zawn lehna hun an neih tawh dawn loh avangin hralh an tum lo a ni.

Strand Larsen hian St. James' Park pan chu a duh ve tho, hetih lai hian Alexander Isak angin nawrh a tum ve lo thung.

Callum Wilson a chhuak a, Alexander Isak chuan chhuah tumin Magpies a kar ve char char bawk nen. Hei vang hian Newcastle chuan Strand Larsen hi lak tumin theihtawp an chhuah mek a ni.

Newcastle United hian Wissa manah £35million bakah add-ons £5million thehchhuak mah se Brentford lamin an lo hnar.

RB Leipzig atangin Benjamin Sesko lak an tum, club pahnih te chuan inremna nei mah se, Manchester United an rawn lang a, Sesko chuan Old Trafford lam a thlang ta bawk.

Tin, Liam Delap leh Joao Pedro te pawh nipui bazar tir lamah khan an ngaihven a, inbiakna kalpui thui viau tawh mah se, Chelsea an ngam ta lo a ni.

Strand Larsen hian kum 2024 nipui lai khan Celta Vigo atangin Wolves a pan a, an inleina kha €27m vel nia report a ni. Season liamta Premier League-ah vawi 34 a inlan a, goal 14 khungin, assist vawi 4 a nei a, kum 2029 thleng Wolves-ah contract a nei a ni.