Ningani zan zanlaiah Barcelona chuan Newcastle United an tlawh dawn. Champions League match-ah hian Lamine Yamal chu tihrawl hliam avangin a inlan ve thei dawn lo.

6-0 laia Valencia an hneh ṭum pawh khan Barcelona tan Yamal a inlan thei tawh lo a, Newcastle United hmawchhawn inbeisei viau mah se, St James' Park-ah a hmel kan hmu ve thei dawn ta lo a ni.

International break lai khan Yamal hi Spain tan a fehchhuak a, Bulgaria leh Turkey a hmachhawn a, minute 150 lai painkiller hmang chungin a inkhel. Hemi chungchangah hian Barcelona head coach Hansi Flick pawh a lawm lo hle nghe nghe.

Kum 18 mi hian tun season La Liga-ah goal 2 a khung tawh a, assist vawi 2 a nei tawh bawk a, Flick-a ralthuam pawimawh ber pakhat a ni chho leh mek. Hetih lai hian a inhliam takah chuan Barcelona tan channa nasa tak a ni mek a ni.

Valencia an hmachhawn ṭum khan Flick chuan squad a siksawi nasa hle. Raphinha leh Robert Lewandowski te chuan inkhelh bul an ṭan lo a, hmatawngah Marcus Rashford, Roony Bardghiji leh Fermin Lopez te an inlan.  
Frenkie de Jong leh Dani Olmo te pawh Valencia an hmachhawn ṭum khan inkhelh bul an ṭan lo a, Barca hian tun season La Liga game 5 aṭangin point 10 an hlawhchhuak tawh a ni.