Kevin de Bruyne chuan inhliam avangin Newcastle United a hmachhawn thei dawn lo.

Tun inrinni zan hian Man City chuan Newcastle an hmachhawn dawn, Inter Milan nena an inhmachhawn tuma inhliam De Bruyne a la inlan thei dawn lo. Belgian midfielder hian Arsenal a lo hmachhawn thei tawh lo bawk.

Zirtawpni press conference a neih tumin Pep Guardiola chuan Rodri a chawlh rei tur thu a sawi a, a khup dinglam hliam a lo na hle a, zai a ni ang a, a lo berah thla 9 emaw vel tal a chawlh a ngai dawn.

A midfielder tha pahnih tel loin Guardiola chuan Newcastle United a hmachhawn dawn a, De Bruyne hi International Break zawhah chauh a lo kir leh theih a rinawm a ni.

"Rodri chu ACL injury a ni a, atan chuan tun season a zo kan ti thei awm e, season tharah chauh kan beisei thei tawh ang.

"Chanchinthar duhawm loh deuh kan nei a ni. Tha taka lo kir leh turin kan duhsak a ni.

"ACL injury neih avanga thla 9 lai chawlh a mamawh ta chu a ni a, a tel loa khelh dan kan zir a ngai dawn ta a ni," tiin Guardiola chuan Rodri chungchang a sawi.

Guardiola chuan January transfer window inhawn hunah Rodri aiawhtu tur an zawn tur thu a sawi tel bawk.