Newcastle chuan Southampton defender Tino Livramento an la lut a, kum 5 chhung atan contract an ziak.

England Under-21 international full-back hian Magpies a zawm fel a, club pahnihte hi £35million bawr velin an inrem nia report a ni.

"Newcastle United zawm hi ka phur lutuk a, fan-te hmaa inlan hlan a ngaihhlehawm tawh khawp mai. Kartawp lam game-ah chuan ka inlan hman tawh ka beisei.

"Friendly match mah ni se fan an pungkhawm hnem thin a, an bengchheng tham tho. Fan-te hmaa Premier League leh Champions League khelh hi eng ang chiah nge a nih ka hre chak tawh.

"Manager-in football a khelhpui dan hian min hip em em a, ka khelh dan nen pawh a inrem dawnin ka hria. Season hmasaa an chetdan leh tuna an dinhmun ngaihtuahin, ka tan chuan phurawm hlang a ni mai. An zinga tel hlan ka nghakhlel,"tiin Livramento chuan club website a hrilh.

Newcastle boss Eddie Howe chuan tun nipuiah player 3 a lak luh belh tawh a, Italy midfielder Sandro Tonali chu AC Milan atangin  a la lut a, winger Harvey Barnes pawh Leicester atangin an lo hruai lut tawh bawk.

Kum 20 mi Livramento hian August 2021 khan Chelsea atangin Southampton a zawm a, £5m-in kum 5 chhung atan contract an ziak. A inhliam avangin a inlan mang lo a, season hman zawh tak game hnuhnung pahnihah chiah a inlan hman.

"Tino hi naupang talent nei tha lutuk a ni a, kan la lut thei hi kan lawm khawp mai. Kum 20 mi lekah chuan tawnhriat a nei tha a, a theihna hian team a hlawhtlinpui theih ka beisei.

"Ka duhzawng tak a ni a, thawhpui thuai thuai a, a hmasawn dan hmuh ka chak tawh,"tiin Howe chuan a sawi bawk.