Newcastle manager hlui Steve Bruce chuan Newcastle United a enkawl lai khan miin an duh tak tak ngai lo niin a sawi a, an chak lovin nasa taka sawisel a nih thin thu leh, a chak pawhin an vanneih vang emawa miin an ngaih sak thin thu a sawi bawk.

Tun thla tir khan Newcastle hian neitu thar an nei a, Saudi lam company te chuan Mike Ashley hnen atangin Newcastle hi an lei a, tunah hian Newcastle neitu thar te hi football club neitu hausa ber an ni.

Newcastle-in neitu thar an neih atanga ni 13 hnuah Steve Bruce hi ban a ni a, tun season-ah Newcastle hian Premier League game riat an khelh tawhah chak an la nei lova, 19-naah an awm mek.

Newcastle-in an ban hnuah Steve Bruce chuan, “Midang lakah ka phut a sang a, ka bula thawh hi chuan an rim em em thin a, a bikin ka naupan deuh lai khan heti ang hi ka ni nasa zual a, chuvang chuan ka bula thawk tawh zawng zawngte chungah lawmthu ka sawi a ni.

“Kan chak lohin sawisel kan tawk nasa em em thin a, Premier League-ah Birmingham , Wigan , Hull leh Sunderland-te ka lo enkawl tawh a, chuvang chuan heti ang insawiselna hi chu loh theih lohna avangin ka pawm thiam viau tawhin ka hria.

“Newcastle ka enkawl meuh kha chuan eng ang pawhin miin min sawisel se ka enliam theih ka inbeisei viau a, mahse harsa ka ti hle. Min duh tak tak loa, ka hlawhchham an duh a, ka hlawhtlin an rin loh thu an ziah te leh ka tangkai loh zia an sawina te hi a tir te atangin hmuh tur a awm.

“Kan khelh that ve deuh chhunah pawh ka football kalhmang an sawisel loh pawhin kan vanneih vangah an ngai a, kan result a that pawha heti ang hmuh tur a awm hi chu a nuam lo tak zet a ni. Relegate tur team angin min sawina a tam em em a, mahse kan season hmasa berah 13-na kan ni a, a kum lehah a aia nasa in miin in sawisel a, mahse 12-na niin, a tawp lam pathumte aiin point 17-in kan sang.

“Nuam tih ka tum hle a, ka tum zia chu in hriat ka ring. Midang min sawiselna te a dik loh zia lan tir te kha nuam ka ti a, mahse a bak a awm thei ta lo. Kan chak pawhin kan supporter-te lakah kan chak lo ang mai a ni thin a, chuvang chuan ka tan kal zel theih a ni ta lo a ni,” tiin Telegraph a hrilh.