Newcastle-ah Howe a nghet

06th August 2022, 08:08AM

Newcastle United chuan an manager Eddie Howe chu hun rei daih contract an ziahpui thu Zirtawpni khan an puang.

Howe hian Magpies hi nikum November thla khan a zawm a, hetah hian kum 2024 June thla thleng daih contract ziakin, Newcastle hian thla 9 chiah an chhawr hnuah a contract an pawhsei sak a ni.

Howe-a’n Newcastle a enkawl tirh hian 19-naah an awm mek a, tla mai thei dinhmunah an ding hman a, mahse season tawpah erawh Newcastle hian 11-na niin season an khar.

Howe chuan, “Newcastle United head-coach ka ni hi ka inchhuang em em a, ka awm tirh atang khan nuam tih loh lai ka la nei lo. He hunah hian ka coaching team te bakah, staff leh supporte te ka fak duh a, he hmun hi anmahni avanga nuam a ni,” tiin contract thar a ziah chungchang a sawi.

Nikum October thla khan Newcastle hian neitu thar an nei a, January thla khan player lakluh nan pound maktaduai 85 an seng.

Tun nipui bazar chhungin Newcastle hian Sven Botman, Matt Targett leh Nick Pope te an lalut tawh bawk a, pound maktaduai 50 vel an seng tawh a ni.

Copyright © inkhel.com 2022. All rights reserved.