Germany captain Manuel Neuer leh an midfielder Leon Goretzka te chu Nilaini khan COVID 19 an positive ve ve a, Germany squad atangin an inhnukdawk.

Germany hian tun thla hian UEFA Nations League inkhelah Hungary leh England te an hmachhawn dawn a, Bayern Munich player pahnih Neuer leh Goretzka te hi an inlan thei dawn lo.

Kum 36 mi Neuer leh kum 27 mi Goretzka te chuan Frankfurt-a Germany camp an chhuahsan fel tawh a, tunah hian an inkhunghrang mek a, harsatna liantham an nei lo nia sawi a ni.

Neuer-a hmunruak hnawhkhat tur hian Hoffenheim goalkeeper kum 32 mi Oliver Baumann koh a ni a, Goretzka hmunruak hnawhkhat tur erawh he chanchin ziah lai hian koh a la ni lo.

Neuer leh Goretzka te an positive avang hian, contact tracing an ti dawn a, an inhnimhnaihpui te test ni ve leh dawnin, Germany camp-ah hian positive an awm belh lovang tih a sawi theih loh.

Germany hian tun kar Zirtawpni hian Hungary an mikhual dawn a, karleh Thawhtanni-ah England nen Wembley Stadium-ah an inhmachhawn dawn a ni.