UEFA Nations League semi-final khelh zawh a ni a, semi-final khelh hnuhnun zawkah Netherlands chuan 3-1 in England an hneha, Netherlands hian final-ah Portugal an tum ang.
Netherlands tana goal khungtu te hi Ajax captain Matthijs de Ligt leh Quincy Promes bakah English defender Kyle Walker chu a own-goal a, England goal neih chhun khungtu hi Manchester United player Marcus Rashford niin penalty box atanga a thun a ni.
Ti hian Nations League hmar bawk a ni dawn ta a, Third Place inchuhna hi tun Sunday zan dar 6:30-ah khelh a ni dawn a, Switzerland leh England-ten an khel ang. Final hi tun Sunday zanlai (Monday zingkar) dar 12:15 leh a chanve-ah khelh a ni dawn bawk a, sawi lan tawh angin Portugal leh Netherlands-te chuan Nations League-a champion hmasa nih an inchuh dawn a ni.
Netherlands 3-1 England
(De Ligt 73’, Walker 97’ OG, Promes 114’) (Rashford 32’ pen)
Player Ratings
England - Pickford 6,Walker 5, Stones 4, Maguire 4, Chilwell 5, Rice 4, Barkley 5, Delph 4, Sterling 5, Rashford 5, Sancho 5..subs: Kane 5, Henderson 5, Alli 5
Netherlands - Cillessen 5, Dumfries 5, De Ligt 6, Van Dijk 6, Blind 7, De Roon 5, Wijnaldum 6, De Jong 8, Bergwijn 5, Memphis 6, Babel 4..subs: Promes 7, Van de Beek 6, Strootman 5, Propper 5.
Match Report
Netherlands hian 4-2-3-1 formation an hmanga, Barcelona goalkeeper Jasper Cillessen chuan si ban nghakin, defence-ah Dumfries, De Ligt, Virgil Van Dijk leh Daley Blind-te an intlar. Midfield-ah De Roon leh Frenkie de Jong-te inkawpin, wing-ah Bergwijn leh Ryan Babel-te dah an ni a, Memphis Depay chu hmatawngah hmatlat tir niin a hnungah Wijnaldum dah a ni bawk.
England hian 4-3-3 formation an hmanga, Jordan Pickford chu si ban nghaktu a ni a, defence-ah Walker, John Stones, Harry Maguire leh Ben Chilwell-te dah an ni. Midfield-ah Fabian Delph, Ross Barkley leh Declan Rice-te awmin, tlar hmaah Jadon Sancho, Rashford leh Raheem Sterling-te an awm .
Inkhel hmuhnawm tak a ni a, team hnihte an inhlau lem lo mahse England hi inkhel tam zawkah an bet. England hian hma an hruai hmasa a, darkar chanve vel khelh a nihin Dutch defender De Ligt chuan an box chhungah Rashford a ti tlu; England-in penalty an hlawhchhuak a, penalty spot atang hian Rashford chuan goal-ah khung zuiin, England in si khat faiin hma an hruai.
Netherlands hian an si phurh sut tumin bei viau mahse goal an khung thei lawk lo. Second-half tawp hnaih lam deuhah Netherlands chuan an si phurh an sut ta nge nge a; penalty chawitu De Ligt chuan corner atanga ball vawrh luh chu chiang takin England goal-ah tauh lutin, Netherlands si phurh a rul.
Goal an chhuah hma zawngin England an bet hle a, hma hruai zawk ni mahse Netherlands hian an nawr bet viau. Mahse England hian goal an chhuah hmasak ber hnuah substitution –te siamin Harry Kane, Jordan Henderson leh Dele Alli-te an dah lut a, Netherlands an nawr let ve a, mahse goal erawh an khung thei tawh lo.
De Ligt-a goal khung atanga minute sawm vel a liamin England in goal an khung emaw an ti a, an khel a mawi a, Barkley chuan Jesse Lingard chu tha taka ball pe in , Lindgard hian goal-ah a pet lut. England in goal an khung emaw an ti zet mahse VAR-a endik a hnuin Lingdard hi a offside-a, goal a pawm a ni lo.
Team hnihte hi hun pangngaiah chak zawk an awm thei lova, Extra Time khelh a ni. England khel a nawi angreng thin a, tihsual an ngah bawk. ET-ah England tihsual avangin Holland hi an chak a tih theih a, England khelh danin dem a hlawh hle. ET an tran a, minute sawm pawh khelh a nih hma in Holland lamin hma an hruai ta; Stones chuan defence-line ah ball a khalh, a inthlahdah angreng hle a, Depay chuan ball a chhuhsak, Depay hian lei hrulah goal-ah a chhuih mahse Pickford chuan tha em em in a lo save; Pickford-a save per hi goal-ah chantir zui niin Walker-a own goal angin a kal.
114mins-ah Netherlands chuan an goal thumna an khunga, hei pawh England inthlahdah vang bawk a ni. Promes chuan defence-line lama Barkley ball keng lai a chhuhsak a, Depay-a’n ball a chang; ani hian Promes pe ve lehin Promes hian goal-a a pet lut zuia, England tan beisei tur a awm tawh lo. 3-1 in inkhel tihtawp a ni a, England hi an tihsual vang liau liau in final an lut lo a tih theih awm e.
