Mixed Martial Arts khawvel nghahhlelh UFC 266 chu naktuk zing dar 7:30 am hian Sony Ten 2 channel-ah a en theih leh dawn. He event nghahhlelhawm takah hian Ultimate Fighter season 29 coach pahnih an inkhuainuai tur hi a nghahhlelhawm tawh riau. UFC Featherweight Champion Volkanovski chuan featherweight huanga inpawmchilh lama hlauhawm ber ,saphai ang maia zial nghet thin leh number 2 featherweight contender ni mek Ortega a hmachhawn tur hi en loh phal chi a ni dawn lo.
Co-main event lamah nise, Valentina Shevchenko chuan flyweight champion anih hnua vawi ruk title fight neihna tur a hmachhawn thung ang. Shevchenko hian hmeichhe flyweight number 3 contender ni mek Lauren Murphy lakah fiahna a paltlang zo ang em?
Mipuite 'main event' an tih hial, kum 17 hnua rematch ni leh tur, 'fight fans' in an lo thlir chak tawh Nick Diaz leh Robbie Lawler an innuai bawk ang.
Heavyweight huanga inbuan thiam leh tharum nei tha tak Curtis Blaydes leh knockout artist Jarzinho Rozenstruik insual a awm dawn bawk. Main card opener lah a duai dawn lo, hmeichhe straweight champion hlui leh hmanni lawka flyweight title chuhtu Jessica Andrade leh champion nih tuma Octagon chhunga rorum taka che thin Cynthia Calvilho an innuai bawk ang.
Khawvel nghahhlelh Volkanovski vs Ortega
UFC 266 main event mawlh hi en loh phal chi a ni dawn lo. Mi tam takin featherweight fighter tha bera an chhal Max Holloway vawi hnih hneh thei hi mi pahnih chiah an la awm. Chung zinga pakhat chu Alexander Volkanovski, tuna featherweight champion nilai mek hi a ni. Rugby front rower thin, feet 5'6 inch vel lek ni chunga 214 pounds vela rit ni thin, tunah erawh 145 pounds ah a taksa rihna a tihniam tawh. A pa te ti mahse featherweight huanga pa sang pahnih Ortega leh Holloway-te aiin a ban a sei zawk thung si. A tharum neih zia chu a tumpui ten an sawi chamchi a, hetih laia a kut leh ke thlawk chhuak rang lutuk, na bawk si an tluksawp pui dan lah hai theih a ni lo. Minute 10 zawh hmaa Chad Mendes a hnek tlawm dan te, UFC Legend leh kum 10 chhung hnehloh nei lova awm thei Jose Aldo a hneh zui dan mawlh te hi a pui thlawt.
Volkanovski hian tharum leh a chet ranna hmang tangkaiin tukzal a tum viau mai thei. Saphai ang maia vial nghet thei Brian Ortega lakah erawh a fimkhur ve viau a ngai dawn. Ortega hian Holloway laka MMA career-a a vawi khat chak lohna a tawn hnuin nasa taka insiamrem chhovin striking lamah a insawrbing viau a, Octagon chhunga a inlan hnuhnun berin Chan Sung Jung lakah khan a en ho chuan an hrethiam ngei ang. Hemi tuma a hming lemah Ortega 2.0 an tih hial kha. A khabe kual ah vawi tam Holloway pawhin a hnek hnuin a hnek tlu zo lo. Tuna featherweight champion Volkanovski erawhin knockout ngei a tum viau thung. A hmuhnawm miah miah khawp ang.
Insual langsar dang
Hmeichhe flyweight bout-ah Shevchenko chak turin an ngai leh deuh tawp. Odds lamah pawh -2000 te a ni hial. A zawna vawi 5 chak mek Murphy hian a khawih fuh chuan tuk tlawm theihna a nei reng tih erawh hmuh hmaih loh a tha. Hetih lai hian kum 38 a upa Murphy hian a hun tha bawhpelh vaih chuan title fight a nei thei leh kher tawhlo thei. Kawng engkimah Shevchenko hi tha zawk angin lang mahse, Michael Bisping-an Rockhold a tuk tlawm ang kha kan hmu leh lovang tih a sawi theih bik loh. Middleweight bout-ah Nick Diaz chuan kum 2004 kuma a lo hnek tlawm tawh Robbie Lawler nen an inkhuainuai dawn thung. He mite pahnih insual tur hi minute 25 awh tur a ni dawn nghe nghe. Diaz brothers inlan apianga thisen chhuak thin leh an tawrhfeina thlir chakin khawvel mipuiin thlir hlan an nghakhlel. Welterweight champion hlui Lawler erawh a zam vaklo. Kum 17 hnua an innuai leh hnuin phuba lak tumin a tuk tlawm thei ang em? Naktuk lamah a chiang mai ang.
Main card
Featherweight
Alexander Volkanovski (c) vs. Brian Ortega
Women’s Flyweight
Valentina Shevchenko (c) vs. Lauren Murphy
Middleweight
Nick Diaz vs. Robbie Lawler
Heavyweight
Curtis Blaydes vs. Jairzinho Rozenstruik
Women’s Flyweight
Jéssica Andrade vs. Cynthia Calvillo