England striker hlui Wayne Rooney chuan, England leh Real Madrid midfielder Jude Bellingham chu nakkum Ballon d’Or dawng thei tur zinga a tel thu a sawi.

Kumin nipui lai khan Real Madrid chuan Borussia Dortmund atangin Bellingham hi an lalut a, a manah euro maktaduai 100 chuang thehchhuakin kum 6 daih contract an ziahpui.

Los Blancos hian kum 20 mi manah hian add ons zawng zawng nen chuan euro maktaduai 134 vel seng thei mah se, an lalut fuh dawn hle niin a lang a, tun season-ah Bellingham hi Real Madrid tan a che tha hle.

Bellingham hian competition hrang hrangah Real Madrid tan tun season-ah game 17 khel tawhin goal 15 a khung tawh a, assist vawi 4 nei tawh bawkin, thla hmasa khan Golden Boy atana thlan a ni nghe nghe.

Sky Sports in an kawmnaah Rooney chuan, “Tuna a khelh dana a khelh zel chuan nakkum Ballon d’Or a dawn theih lohna chhan tur a awm lo. Messi leh Ronaldo ten an indawn chhawk hun kha a ral tawh a, nakkumah hian he lawmman hi player paruk velin an inchuh a rinawma, tun anga a kal zel chuan dawng thei tur zinga rinkai ber a ni ngei ang.

“Ram dangah English naupang a hlawhtling hmuh hi a lawmawm hle a, ram danga kal tur chuan huaisen a ngai a, Germany-ah pawh a che tha tawh a, tunah khawvela club lian ber pakhatah a parvul leh mek bawk. Ka lawmpuia, heng zawng zawng hi Euro-ah a chhawm luh a, kan champion pui ngei ka duh hle a ni,” tiin a sawi.