Rafael Nadal chuan kumin November thlaah Tennis khelh a chawlhsan dawn.

November thla hian Malaga, Spain-ah Davis Cup khelh a ni dawn a, he tournament zawhah hian Nadal chuan Tennis khelh a chawlhsan dawn ta a ni.

"A nihna takah chuan, kum harsa tak ka tawng. Kum hnih liamta chhung kha chu a hautak em em, ka theihna zawng zawng pawhin ka khel chhuak thei lo.

"Thutlukna siam harsa tak a ni a, ka nuna thutlukna siam harsa ber a ni hial ang. Chutih laiin thil reng reng hian intan hun a nei a, tawp hun a nei bawk a ni.

"Ka thil tawn te kha ka thlir let a, vannei ka inti hle. Tennis industry leh tennis sport-a mi zawng zawng, ka thawhpui thin te leh ka elpui thin te chungah lawmthu ka sawi.

"Inkhelh chawlhsan nan chuan tun hi hun tha niin ka hria a, hun rei tak hlawhtling takin hun ka lo hmang tawh a, ka beisei phak bak a ni," tiin kum 38 mi Nadal chuan a sawi.

Nadal hian kum 15 mi lek a nih laiin professional career a tan a, Sevilla-a Challenger Tournament-ah niin, a inkhelh chhungin Grand Slam title 22 a la a ni. Heng zingah hian French Open 14 a tel.