PSG an hmachhawn tumin Jamal Musiala chu a ngalruh a tliak palh hlauh a, a lo berah thla 5 tal a chawlh a ngai dawn.

Inrinni zan khan PSG leh Bayern Munich te chuan Club World Cup quarter-final an khel a, first half tawp hma hretin Musiala leh PSG goalkeeper Gianluigi Donnarumma te chu an insu bur a, hetah hian Musiala ngal ruh a tliak ta a ni.

Musiala hi zawn chhuah a ni a, Serge Gnabry chuan a rawn thlak. Kum 22 mi Musiala hian Pathianni khan Munich a pan a, zai tura ruahman a ni a, a lo berah November thla hma chu a lo kir leh theih a rinawm loh.

A ngal ruh te zawk chu a kerek bulah a tliak tih hriat a ni a, PSG goalkeeper Gianluigi Donnarumma ball man turin a rawn bawh tliak palh hlauh a ni.

Donnarumma chet dan hi Bayern Munich goalkeeper Manuel Neuer chuan a dem hle a, khatianga midang tana inhliam theihna khawpa chet kha a fuh loh thu a sawi.

Italian goalkeeper Donnarumma hian social media lamah Musiala chu dam leh vat tura a duh thu a tarlang ve bawk.

Bayern Munich boss Kompany chuan inkhelh zawh interview a neih tumin a thinrim thu a sawi chhuak a, a thinrimna hi Donnarumma lakah ni loin, kha chetsualna a thlen avanga thinrim a nih thu a sawi.

Musiala hi Bayern Munich tan player pawimawh tak a ni a, hun rei tak a inkhelh theih loh chuan, Bayern Munich tan a pawi dawn hle a ni.