March ni 24, 2023 zan khan R. Dengthuama Indoor Stadium, Mualpuiah Mizoram Super League Season 8 Final khelh tan a ni a.

Final hi Best of 3 a ni dawn a, game hmasa berah Khatla TBL chuan 76-73 in champion lai Zarkawt BCA an hneh. Thawhlehni zanah Game hnihna khelh a ni ang a, hetah hian TBL an chak a nih chuan an champion tawh dawn a ni.

TBL lamin inkhelh bul an tan tha zawk a, 1st Quarter-ah 26-22 in hma an hruai. Quarter hnihnaah erawh BCA an rawn insiamrem chho a, half time a nih chuan 40-40 a ni.

Third quarter-ah BCA an chungnung hret a, quarter hnuhnung berah erawh TBL an khel tha a, inkhelh a zawh meuh chuan 76-73 in Khatla TBL chuan hnehna an chang ta a ni.

R. Dengthuama Hall-ah inkhel entu mipui an khat thap, Mizoram chhunga Basketball team tha pahnih inhmachhawn hi mipuiin an hlut a, Final Game 2 pawh a HOT leh dawn hle a ni.

Final Game 1-ah hian BCA tan Joseph Allen a khel tha leh pek hle, point 26 a thawk chhuak a,  offensive & defensive rebounds pawh vawi 25 lai a la, Lalrina Renthlei pawhin point 18 a thawk chhuak bawk, hetih lai hian chak nan a tawk zo ta lo a ni.

Khatla TBL tan Vanlalthazuala a che Bawn tak zet, point 27 a thawkchhuak a, Joshua Keyes chuan point 24 a thawkchhuak bawk a, anni pahnih hi TBL chakna an ni kan ti thei awm e.

Final Game 2-ah Zarkawt BCA an tlawm nawn a nih chuan, an title an humhim thei dawn lo a, Khatla TBL kutah Title an hlan dawn tihna a ni. Hetih lai hian champion lai hian title humhim an tum ngei dawn, Game 2 a hmuhnawm khawp ang le.