February ni 21, Nilaini zan Mizoram Super League (MSL) Season 4 game 13-na khelh a ni a, semifinal lut chiang ve ve tawh Zarkawt BCA leh Mission Veng Vikings inhmachhawnin Zarkawt BCA chuan 74-70 in Mission Veng Vikings an hneh.

Semifinal lut chiang tawh Zarkawt BCA hi team țha ber an ni ti ila kan sawisual awm lo ve. Vawi 4 khel tawhin an la chak vek a, point 8 neiin table-ah pahnihna an hauh mek a, match khat khelh hmabak la neiin February ni 23, Zirtawp zanah Mission Vengthlang Hollow an hmachhawn leh ang a, hnehna an chan chuan table-ah pakhatna an hauh ang.

Mission Veng Vikings hi champion lai an ni a, Vawi nga khel tawhin league round an match hnuhnung ber a ni a, Zarkawt BCA chiah hneh loh an nei a, Point 9 neiin table hmahruaitu an la ni rih a ni.

Team pahnih te an inhneh tawk hle a, chak zawk tur hriat thiam a har a, hmahruaitu zawk awm hlei thei lo a an innawr tawn zak zak hnuah chak phu zawk Zarkawt BCA an chak ta a ni.

Zarkawt BCA tan hian Lalrina Renthlei leh Dennis Lalmuanpuia te an thawh hlawk hle a, an chakna hnar an ni. Lalrina Renthlei chuan 24pts a hlawh chhuak a, Dennis Lalmuanpuia chuan 15pts hlawh chhuakin rebounds vawi 10 la in double double a nei a, Zonunsanga chuan 12pts a hlawh ve bawk.

Mission Veng Vikings hian bul tan tha zawk mahse hun pawimawhah tih sual an ngah an tuar a, hnehna chang turin second quarter leh third quarter-ah tihsual an ngah an tuar ta a ni. Michael F Lalawmpuia chuan 18pts, Moses Zorema 13pts leh Zonunsanga 13pts a hlawh chhuak ve bawk.

Mission Veng Vikings chuan bul tan tha zawkin hmahruaitu zawkah tang mahse, second quarter-ah erawh Zarkawt BCA an chungnung zawk a, Dennis-a chuan point 9 lai hlawh chhuakin second quarter a zawh meuh chuan Zarkawt BCA chuan 40-38 a hmahruaiin chawlh lawk an hmang.

Third quarter-ah pawh Zarkawt BCA bawk hmahruaitu zawkah tangin Lalrina Renthlei chuan point 13 zet a hlawh chhuak a, quarter hnuhnung berah Mission Veng Vikings insiam tha mahse Michael F Lalawmpuia leh Zonunsanga point hlawh chhuah chuan a chhanhim zo lo a, Zarkawt BCA chuan 74-70 in hnehna an chang ta a ni.