Mizoram Super League Season 3 semifinal hmasa zawk game 1-ah Khatla TBL chuan 67-65 in Zarkawt BCA an hneh a, May ni 9, Thawhleh zan khan R Dengthuama Indoor Stadium-ah game 2 khelh leh a ni a, Zarkawt BCA chuan 58-56 in hnehna an chang ve thung. Semifinal game 3 hi May ni 11, Ninga zan dar 8:00 PM-ah khelh leh a ni ang a, hnehna chang zawk zawk hian final an lut tawh ang.

Zarkawt BCA hian mizo hlangin an khel a, Khatla TBL hian state pawn player an lak thar Akash Deep Hazra chhawr nghal mahse an chakpui zo lo.  Inkhel tan a ni a, TBL chuan  inkhel thunun zawkin  Vanlalnunsanga leh Vanlalmuana te an thawh hlawk hle.  BCA tan Zonunsanga langsar ve bawk mahse midangin an thlawp that loh an tuar thung. Second quarter tawp lamah TBL tan coach cum player Mapuia rawn lut ve bawkin danglamna a rawn thlen nghal second quarter a tawp meuh chuan TBL chuan 32-24 a hmahruaiin chawlh lawk an hmang ta a ni.

Third quarter-ah pawh TBL chuan hmahruai zelin Akash Deep Hazra a thawh hlawk hle a, midangin an thlawp tha bawk nen hnehna chang zawng tur a rinkai zawk an ni. Quarter hnuhnung berah BCA in siam tha in Zonunsanga, Dennis Lalmuanpuia leh Matthew Remtluanga te an rawn thawh hlawk hle a, 3points anluh theih bakah rebound an la thei hle nghe nghe a, an rawn umpha ta 56-56 a ni.  Hun tawp nan second khat pawh a awm tling tawh lo tihah BCA tan Henry Lalramngaihawma chuan free throw hlawh chhuakin an chakna point arawn thun a, 58-56 in hnehna an chang ta a ni.

Inkhel puipui thlirin TBL hian an khel tha hle a,  Vanlalmuana point 15,  Akash Deep Hazra point 11 leh Vanlalnunsanga point 9  an thawk chhuak  a,   quarter hnuhnung berah  an thawh hona that tawk loh leh  turnover an ngah an tuar ta a ni.

Zarkawt BCA hian quarter tinah hneh lo mahse quarter hnuhnung berah an thawh hona that an chakpui kan ti thei awm e. Hnehna an channa a tan a thawh hlawk Zonunsanga chuan point 23 zet score-in Dennis Lalmuanpuia chuan point 15-a score thung a,Henry Lalramngaihawma leh Metthew Remtluanga te sawi hmaih theih an ni lo bawk.