Zote Toyota Mizoram Premier League season 10 final-ah Mizoram Police FC chuan penalty shootout hmangin Chanmari FC an hneh a, a vawi khat nan Mizoram Police FC chu MPL champion an ni ta a ni.
First half-ah si hnih faiin Mizoram Police lamin hma an hruai, second half tir lamah Chanmari FC lamin an siphurh an rul zo.
Rinzuala hnawhchhuah a ni a, Mizoram Police FC lam kim loin khel mah se Fakzuala chuan Police hma a hruaipui leh, Chanmari FC tan bench atanga lut Vincent chuan Chanmari FC siphurh a rul leh.
Hun pangngaiah 3-3 in an inhnehtawk a, extra time khelh a ni, first half-ah goal a lut lo. A tam zawk Chanmari FC lamin a tam zawk an nihna an chhawr tangkai thei lo.
Extra time second half-ah pawh goal a lut lo a, penalty shootout hmanga chak zawk zawn a ni a. Mizoram Police FC chuan penalty shootout-ah hian 3-2 in hnehna an chang ta a ni.
Final duhthusam a ni a, goal 6 lai a lut. Red card kan hmu bawk a. Tin, team hnih te an inhnehtawk avangin penalty shootout hmanga chak zawk zawn a ni leh bawk a, final hmuhnawm tak a ni chiang e.
Mizoram Police FC 3-3 Chanmari FC (3-2 pen)
(Sawmfela 16', Biaktea 29', Fakzuala 74') (Crespo 52', 60', Vincent 80')
Red card: Rinzuala 63' (MPFC)
Mizoram Police FC XI : Muanawma, B. Sena, Ahmuntea, Ruatpuia, Rinzuala, BTA, MSA, Lawma, Biaktea, Fakzuala, Sawmfela.
Chanmari FC XI : T. Mawia, Sanga, Rinchhana, Mawizuala, Mampuia, Gante, Abawiha, Crespo, Zozoa, Danmawia, Khawpuimawia.
Goal hmasa ber hi minute 16-a lut a ni a, Malsawmfela leh MS Tluanga an in one two, Sawmfela chuan penalty spot vel atangin cool takin a pet goal.
Goal hnihna hi minute 29-a Biaktea khung a ni a, Lawma ball pek tha tak chu box dinglama awm Biaktea chuan a shot, far post lamah lei hrulah a chhuih goal a, si hnih faiin Mizoram Police FC chuan hma an hruai.
Second half-ah Chanmari FC an rawn er let ve leh. Minute 52-ah Box veilam sir atanga Mawizuala cross chu far post lamah Crespo chuan a lo chhuih lut, an siphurh a sut then.
Minute 60-ah Crespo chuan Chanmari FC siphurh a rul zo ta, mual veilam sir atanga Abawiha ball vawrh tha tak chu box chhunga tlan luh pahin Crespo chuan a tauh a, far post lamah mawi zetin a lut, 2-2 a ni ta.
Minute 63-ah Rinzuala hnawhchhuah a ni a, mual veilam sira Zozoa ball khalh lai chu Rinzuala hian a titlu a, referee chuan yellow card vawi hnihna phawrhin Rinzuala a hnawhchhuak a, Mizoram Police FC chu kim loin an khel chho tan ta a ni.
Kim lo zawk ni mah se Mizoram Police FC chuan an nawr char char tho, minute 74-ah Malsawmfela ball pek tha tak chu box veilam sir atangin Fakzuala chuan a shot, a goal mawi kher mai, 3-2 in Mizoram Police-in hma an hruai ta.
A tam zawk Chanmari FC chuan an advantage neih chhawr tangkai an tum, Vincent chu coach-in bench atangin a dah lut. Vincent-a mual chhungah a awm rei lo, goal a khung nghal.
Mawizuala ball vawrh tha tak chu Vincent chuan penalty spot vel atangin a tauh, goalkeeper Muanawma a tauh khum a, top corner-ah mawi lutukin a thlawk lut. Chanmari FC chuan an siphurh an rul leh ta a, hun pangngai a zo a, team hnih te 3-3 in an inhnehtawk.
Extra time khelh a ni a, hetah pawh hian goal a lut lo, penalty shootout hmangin chak zawk zawn a ni ta a. Malsawmfela chuan Police tan a pet hmasa ber, mahse a pet over hlauh. Chanmari FC dinhmun a tha ta zawk, mahse he an dinhmun tha hi an chhawr tangkai leh thei ta bik lo.
John-a pet chu Muanawma chuan a dan sak a, team hnih te an inhnehtawk leh. Police defender Ruatpuia chuan a pet over leh, Chanmari FC tan Hmingthanmawia a rawn pen chhuak a, ani pawh hian a pet over ve leh.
Pali ve vein an pet tawh, Mizoram Police FC goalkeeper Muanawma chuan penalty a pet ve a, a pet goal a, a tawp berah Chanmari FC tan Ruatmawia a rawn pen chhuak a, goalkeeper dinglamah a pet. Muanawma chuan hei hi tha zetin a dang a, 3-2 in Mizoram Police FC chuan hnehna an chang ta a ni.
Khawpuimawia a inhliam a, hei hi Chanmari FC chuan an tuar hle niin a lang. Mizoram Police FC te kim lo zawka khel mah nise, a tawp thlengin defensive game an khel duh bik lo, first half-a si hnih faia hmahruaitu Mizoram Police FC hian champion an phu hle a ni.
Lawmman te :
Fair Play Award : Chawnpui FC
Top Scorer (8 Goals) : Lalrinzuala (Aizawl FC)
Best Goalkeeper : Lalmuanawma (Mizoram Police FC)
Best Defender : Lalhmunmawia (Mizoram Police FC)
Best Midfielder : H. Lalbiakthanga (Mizoram Police FC)
Best Forward : Lalrinzuala (Aizawl FC)
Best Player : H. Lalbiakthanga (Mizoram Police FC)