Mizoram Football Association (MFA) chuan November ni 4, 2024 khan tun hnaia Mizoram Premier League chungchangah thuchhuah an rawn nei a. Mizoram police te nena an thawh ho hnuah Mizoram Premier League season 11-ah khan “corruption” an hailan thu an puangzar. Match thenkhatah “match-fixing” tia kan sawi mai ṭhin, inkhel result nghawng thei tura hmalakna a awm niin an sawi. Hetianga khawsak hi sport ropui leh zahawm tak football-ah hian a len loh thu leh, football ngainatute zah lohna lian tak nia an hriat thu an tarlang.
MFA chuan inelna chi hrang hrang an buatsaihah rinawmna leh zahawmna vawnhim an ngaihpawimawh thu sawiin, dan bawlchhe zawnga mawi lo taka khawsate lakah hremna na tak an leklawh thu an tarlang. Mizoram Premier League tuipuitute leh a buatsaihnaa tel zawng zawng te hnenah dan bawhchhetu player, official leh club te chunga hremna an lekkawh thu leh inelna lo la awm zel tura an inhnamhnawih theih dan thlengin a nghawng tur thu an hriattir.
MFA chuan football ngainatute zawng zawng bakah, MPL buatsaihnaa an thawhpuite hnenah hetiang thil dik lo leh bawlhhlawh a thlen nawn loh nan theihtawpa hma an lak mek thu an sawi bawk a. A ṭul anga dan leh hrai zam sa ennawn a, chak lehzuala dan lekkawh a nih theih nan an inthuam ṭhat tur thu MFA chuan an tarlang bawk.
MFA chuan football ngainatute leh an thawhpuite zawng zawngte he hun harsa tak hi paltlan a nih theih nan an lama ṭang turin a ngen a, mipuiin Mizoram Football Association-ah rinna an nghah ngam zel a, Mizoram football-ah dikna, thahnemngaihna leh inlungrualna a awm zel theih nan thawhho puiah a sawm.
Football hi inelna thianghlim leh langtlang a nih zel a duh thu MFA chuan a sawi a, chumi tihlawhtling tur chuan chak tak leh huaisen taka dinpui turin Mizo mipuite a sawm a ni.
Uluk taka CID te nen an chhui hnuah MFA hian mi player 24, coaching staff mi 3 leh club pathum a hrem.
Betting thilah hian club, coaching staff leh player te hian sum an dawng a, pawisa thaptute thu thuin MPL-ah result an siam a, hei hi MFA chuan ringhlelin, ngawrh takin a chhui a, hremna na tak a chhuah ta a ni.
Club pathum, Sihphir Venghlng FC, FC Bethlehem leh Ramhlun Athletic FC te chu kum 3 chhung atan hrem an ni a, football thila inhnamhnawih thei lo tura hrem an ni hlawm.
Coaching staff zingah, Robert Laldinthara (Sihphir Vengthlun FC) chu kum 5 chhung atan hrem a ni a, Danny Lalduhawma (Ramhlun Athletic FC) chu kum 3 chhung atan hrem a ni a, Johny Ramthansanga (FC Bethlehem) chu kum 3 chhung atan hrem a ni bawk.
Hremna na ber chu dam chhunga football-a inhnamhnawih thei lo tura hremna a ni a, Chanmari FC player Lalnunzama leh FC Bethlehem player L. Lotha te chu dam chhung atan hrem an ni bawk.
An thil tihsual dana zir ang zelin an hrem chhung hi a inang lo a, Sihphir Venghlun FC player 14 ngawt hrem an ni a, FC Bethlehem player 3, Chawnpui FC player 3 leh Ramhlun Athletic FC player 4 hrem an ni bawk.