Pathianni zan khan Turkish Super Lig-ah Fenerbahce chuan Trabzonspor an tlawh a, Mourinho-a team te hian 3-2 in hnehna an chang.
Mual neitu lamin penalty vawi hnih an hlawhchhuak, an inhnehtawk dawn emaw tih hnuah Amrabat chuan Fenerbahce chakna goal a khung a, Mourinho pawh a lawm ngang mai, mual chhungah tlan lutin, a khupin a tawlh nghe nghe.
Inkhelh zawhah Jose Mourinho a ang nasa buan buan, Super Lig match official te nasa takin a dem a, a tawngkam avang hian hremna pawh tawk thei hial maithei a ni.
Kha match-ah khan Atilla Karaoglan chu VAR duty a ni a, referee chu Oguzhan Cakir niin, VAR duty hi Mourinho chuan thingpui in angah a puh hial a ni.
"Hnehna kan chang hi a ropui dangdai lutuk, a chhan chu thuneitute kan hmachhawn a, hnehna kan chang a ni.
"Man of the Match chu VAR official Atilla Karaoglan kha a ni, amah chu kan hmu thei lo, mahse inkhel thununtu ber erawh a ni.
"Match referee Oguzhan Cakir kha chu a thuhnuaia inkhel enkawltu mai chauh a ni. Referee tak tak chu Atilla Karaoglan kha a ni a, chuvang chuan man of the match-ah ka puang kei chuan. Lang lo lam aṭang khan inkhel kha a thunun a ni ber mai.
"Fenerbahce fan-te tana ṭawngchhuak ka ni, khatiang thil kha thleng nawn leh tawh lo se ka duh, thil dik lo tak a ni, kan mamawh lo. Mual chhungah pawh inkhel enkawl lo se, VAR-ah pawh duty tawh lo bawk se.
"Turkey-a ka lo luh hmaa thil kalphung min hrilh ṭum khan ka awih chiah lo, mahse ka rawn luhchilh chiah chu, ka rin phak bakin thil a lo thleng a, Atilla Karaoglan-a lam ṭang nih kha ka thlang zawk khawp ang.
"Kan khelhpui team te kha an ṭha a, Trabzonspor hian coach ṭha tak an nei a, player ṭha tak an nei bawk. Chutih laiin thuneitute lam daih a ni kan hmachhawn ni. Team ṭha kan hmachhawn a, VAR leh thuneitute kan hmachhawn tel bawk.
"A hautak em em a ni tawp mai, chuvang chu a nia kan chak chiah khan theihtawpa ka celebrate. Khatiang thunei tak tak te hmachhawn chunga hnehna kan chang kha ka rin phak bak a ni.
"Fenerbahce mipui te ka dem hle, an hnena min hruai lut hi ka dem a ni. Thu dik chanve chiah min hrilh a, thil zawng zawng min hrilh lo. Thu dik tak kim changin min hrilh selang chuan Turkey-ah hian ka lo kal hauh lo ang. Mahse ka nau te an huaisen a, an theih tawpin an bei a, thuneitute an hmachhawn hi ka lawm a ni.
"Thuneitute'n hma an la tak tak a nih chuan, kei pawh hi neksawr ka la ni ang. Fenerbahce mipui te hian an theihtawpin hmachhawn ve se ka duh a ni.
"Red card phawrhna turah phawrh a ni lo, khatih lai khan Karaoglan khan coffee a in a niang. Penalty vawi hnih kan chawinaah erawh phur em emin ngun takin a endik leh lawi si. Penalty kan hmuh ve na turah erawh Turkish thingpui a lo in leh daih bawk a niang, nge a lo muhil zawk?" tiin Mourinho chuan a sawi.