Italian Grand Prix 2025-ah Max Verstappen chu pakhatna a ni a, title inchuhna kawngah Verstappen hian hma a rawn sawn chho hle a, Monza-a intlansiakah hian McLaren team chungchang chu sawi hlawh ber pakhat a ni nghe nghe.
Intlansiak ṭan a ni chiah tihin Verstappen leh Norris te chu an innek nghal sak sak mai. Lap khatnaah Pole aṭanga bul ṭan Verstappen chuan hma hruai mah se, penalty chawi thei nia a inhriat avangin Lap hnihna aṭangin Norris chu hma a hruaitir.
Hemi hnu hian Verstappen chu a hmasa berah rawn kir lehin, a tawp thlengin a ding chang a, record thar rawn siam chhunzawm bawkin Monza-a tlan chhuah hun chhung rei lo ber record thar a rawn siam a ni.
Qualifying-ah Red Bull driver hian lap record thar a siam a, intlansiak tak takah lap 53 chu 1h13m23s-ah a thleng. Kum 2003 khan Ferrari driver Michael Schumacher chuan Lap 53 hi 1h14m19s-ah a thleng a, kha record kha khum thei an la awm lo a, mahse kumin intlansiakah erawh Verstappen chuan a rawn khum ta a ni.
Monza-ah hian McLaren driver pahnih te chuan podium an chuang kai ve ve a, Norris chu pahnihna niin, Piastri chu pathumna a ni. Circuit neitu Ferrari erawh podium-ah an chuang kai ve lo a, Charles Leclerc chu palina a ni a, Hamilton chu parukna a ni bawk.
He intlansiakah hian Driver's Standings-a hmahruaitu Oscar Piastri chu team hotu lamin a team-mate Lando Norris inlehpelhtir turin an ti.
McLaren chuan Piastri chu pit-ah an luhtir hmasa zawk a, Norris a luh ve chuan wheel gun chungchangah harsatna an nei, hei vang hian Piastri aiin second 4 laiin hun a hman rei phah nghe nghe.
A tlan chhuak leh chu a hnung zawkah Norris a tlan phah ta a, McLaren team hotute chuan Piastri chu a team-mate Norris inlehpelhtir turin thu an pe, Piastri chuan team thuchhuak hi a ngaihdan ni lo mah se, a zui ta tho a, chutichuan Norris pahnihna a ni a, Piastri chu pathumna a ni ta a ni.
Drivers' Standings-ah Piastri chuan point 324 hmuin hma a hruai chhunzawm a, a team-mate Lando Norris chuan point 293 a nei a, pahnihna niin, Red Bull driver Max Verstappen chu pathumna niin, point 230 a nei a ni.
Red Bull hian an car an thuam ṭha a, Monza-ah pawh a chak zia kan hmu chiang hle. Season chawhnu lamah hian intlansiak vawi 8 a la awm dawn a, champion tur a la chiang lo a, a hmuhnawm chho dawn hle a ni.