Nizanah khan Liverpool chuan Elland Road-ah Leeds United an tlawh a, mikhual team hi 3-0 in an chak a, Mohamed Salah chuan goal thun vein, Premier League goal 100 a thun tling chiah a ni.
Mohamed Salah chuan minute 20-naah goal a thun a, Liverpool chu a chakpui zui bawk a. Premier League goal 100 a thun tling ta chiah a, hetiang zat goal thun thei 30-na niin, a hmain mi 29 chuan Premier League goal 100 hi an lo thun tling tawh hlawm a ni.
Egypt striker chu kum 29 a ni ve tawh a, heti chung hian zuih lam a la pan lo hle a, sulhnu tharlam tha tak a nei chho thei zel a. Leeds United nen an inkhelh hma khan goal 99 a thun tawh a, a thun hnuhnun ber chu Chelsea nen an inkhelh tum khan niin, penalty hmanga a thun a ni a. Elland Road-a goal khat a belhchhah leh tak avangin Premier League player 29 chauhin an lo la tih theih chu a puitlin ve ta a ni.
Anfield a luhchilh tirh khan Mohamed Salah chu winger anga ngaih a ni a, a hmain English club Chelsea ah thawm nei vak loa a lo awm tawh bawk avangin rinhlelhna nen an thlir hlawm a. Roma atanga Liverpool a zawm hnuah hian amah ringhleltute ngaihdan a phet chiang hle a, kum 4 chhungin Reds tana game 207 khelhah goal 128 zet a thun thei a, an ringhlel zui tawh lo chiang hle.
Goal 128 a thun zinga goal 100 chu Premier League bika a thun niin, heng zinga goal 98 chu Liverpool tana a thun niin, goal 2 chu Chelsea tan khan a lo thun ve hman bawk a. League goal 100 thun tur hian Salah chuan game 162 a mamawh a, hetiang zat Premier League goal thun rang pawl tak niin, goal 100 thun tling tawh mi 30 zingah 5-na a ni.
Goal 100 thun tling rang Alan Shearer (124 games), Harry Kane (141 games), Sergio Aguero (147 games) leh Thierry Henry (160 games) te chiah tluk loh a nei a. Liverpool player ni tawh zingah chuan Premier League goal 100 thun tling thei 8-na niin, a hmain Peter Crouch, Emile Heskey, Steven Gerrard, Nicolas Anelka, Robbie Keane, Michael Owen leh Robbie Fowler te chuan goal 100 an lo thun tawh a ni.
Liverpool tan bika goal 100 aia tam thun thei te chu Michael Owen (118), Steven Gerrard (120) leh Robbie Fowler (128) te an ni a, a che chhe ta viau emaw, hmun dangah a insawn ta daih emaw a nih loh chuan Mohamed Salah hian heng player pathumte hi a khum theih vek a rinawm hle a. Tunah hian 2023 thleng contract a la nei a, Liverpool chuan a contract a zawh hnuah pawh la chelh zui an duh hmel viau a, hei vang hian record thar a siam theih hi a beiseiawm viau a ni.