Los Angeles FC chuan Tottenham atangin Son Heung-min an la lut dawn a, inremna engkim a awm tawh a, LAFC hian an la phochhuak lo mai mai chauh niin The Athletic chuan a tarlang.

Transfer hi an tihfel hunah chuan, Son hi Major League Soccer history-a player man to ber a ni dawn a, LAFC hian Tottenham atangin Son hi $26.5 million (£20 million)-in an lei dawn a ni.

MLS-a player langsar ber chu Lionel Messi a ni a, Son pawh hian MLS a luhchilh chuan, player langsar ber pakhat a ni ve dawn chiang a ni. LAFC hi champion thei team zinga tel chho ngar ngar an ni a, Son an neih chuan beiseina sang tak an nei dawn a ni.

Son hian South Korean mipui a hip em em a, Tottenham-a a khelh lai pawhin South Korean mipui thahnem tak chuan Son-a inkhel en turin London an pan thin. 

United States-ah hian Korean mipui an tam hle a, Pew Research Center-in a tarlan dan chuan, US-ah hian Korean mipui 320,000 lai an awm a, Korea ram pawna Korean tam berna a ni nghe nghe.

Kar hmasa khan kum 33 mi Son hian Tottenham chhuahsan a tum thu a sawi a, kum 10 chuang Spurs tan a khelh hnuah, season liamta khan Europa League no mawi a chawipui a, ropui takin Tottenham a chhuahsan thei dawn ta a ni.

Son hian Spurs tan Premier League goal 127 a khung a, assist vawi 71 a nei bawk. Premier League-a goals+assists nei hnem Wayne Rooney, Thierry Henry, Frank Lampard, Andy Cole, Teddy Sheringham leh Mo Salah te huangah a tel phak hial a ni.

Spurs tan competition hrang hrangah game 333 a khel a, goal 173 lai a khung bawk. Tottenham a champion pui tak avangin Son hian a hna a hlen a, Spurs chhuahsan a tum thu a puan lai hian a mittui a tla hial a ni.