CK Hyundai 17th Mizoram State Muaythai Championship 2021 chu Ramhlun Boxing Hall-ah December ni 10, 2021 (Zirtawpni) khan zawhfel a ni. Apumpuiah SPES GYM an Champion a, Gold 8, Silver 6 leh Bronze 2 an la.

Pahnihna lawmman dawngtu te chu ALPHA GYM an ni a, Gold 8, Silver 5 leh Bronze 2 an la thung. Pathumna lawmman dawngtu te chu Main Training Centre (MTC) an ni a, Gold 3 leh Silver 3 an dawng ve bawk.

Best Desipline Team-ah Vairengte Muaythai Club te thlan an ni a, Best Fighter-ah George Lalmuanawma, Chawnpui, SPES GYM chu thlan ni bawkin trophy a dawng a, Club tel zawng zawng ten certificate an dawng vek bawk.

Akharna hunah hian khuallian Pu C. Lalrinzuala, MSSC, Joint Secretary chuan lawmman semna a nei nghal a, Muaythai tan MSSC chuan an tih theih a awm chuan an tlan chhiat loh tur thu leh puih an ngaihnaah chuan inpuih zel an inhuamthu a sawi. Sport luhchilh hi a inchhirawm loh a, Olympic-ah Muaythai hi telh a ni dawn a, Muaythai tuite tan kawng a inhawn zel dawn thu asawi bakah zirna leh sport a kalkawp theih zia sawiin Player te tih takzet a hmalam pan turin duh sakna a hlan bawk.

Mizoram State Muaythai Championship hi club inelna a ni a, district hrang hrang atangin club 7 telin players 70 an inlan thei bawk. Mizoram State Muaythai Championship a ti tha te hi National Muaythai Championship Imphal-a neih turah Mizoram aiawhin an kal ang.