Kokrajhar, Assam the 30th of July, 2024: Vawiin chawhnu dar 2:40 khan Pu Lalnghinglova Hmar, Minister of State, Sports & Youth Services Department, Government of Mizoram chuan SAI Stadium, Kokrajhar, Assam-ah Durant Cup 2024, Kokrajhar Chapter chu khuallian niin a hawng. Kokrajhar-a Durand Cup hawnna-ah hian Bodoland FC leh ISL Club NorthEast United FC te an intum a ni.
Sports Minister Pu Lalnghinglova Hmar chuan thu sawiin, politician ang ni lovin, infiamna ngainatu leh football fan angin Kokrajhar mipuite hmaah a ding tih a sawi a. Hneh taka Durant Cup thlengtu Government of Bodoland Territorial Region leh Indian Army te bakah, Assam Football Association leh Assam Sawrkar chungah lawmthu sawiin, “Hun engemawchen rambuai ni thinah, boruak ralmuang tak hnuaia Indian Army buatsaih tournament kan khel tur hian infiamna thiltihtheihzia a tilang a ni.” a ti. Football hmasawnna’na theihtawp chhuahtu Bodoland hotute leh mipuite chu chhuanawm a tih thu a sawi bawk.
NorthEast Football Development Council President ni bawk Pu Lalnghinglova Hmar chuan sawi chhunzawmin, state lian lo leh mihring pawh tlemna Mizoram atangin ISL leh I-League ah player thahnem tak an awm reng a, FIFA World Cup qualifier khelh zawh takah pawh India squad-a player 22 zinga 4 chu Mizo an nih thu a tarlang a. Bodoland-ah pawh Indian football level sang ber thleng thei tur talent tha tak tak an awm tih sawiin, Bodoland leh Assam Football hmasawnna’n Mizoram in tih theih a neih chuan a inhawng reng a ni a ti.
Vawiina Durant Cup, Kokrajhar chapter hawnnaah hian Pu Pramod Boro, Chief Executive Member, Bodoland Territorial Region pawhin thu a sawi a. Assam leh Bodoland culture tarlang thei zai, lam leh item dang hmuhnawm tak tak lantir niin, Indian Army helicopter te’n ennawm an entir an bawk a ni.
Indian football calendar khuhhawnna Durant Cup hi kum 1888 a khelh tan niin, kumin hi a vawi 133 na tur a ni a, Asia khawmualpui a football tournament upa ber a ni. Khawvel huap pawhin English FA Cup leh Scottish FA Cup te nen football tournament upa pathum zingah a tel pha a ni.
Durand Cup 2024 ah hian Indian Super League, I-League, Indian Services, Central Armed Police Force bakah foreign team sawm bik te nen team 24 an tel a, Kolkata, Shillong, Jamshedpur leh Kokrajhar-ah te khelh tura ruahman a ni. Final hi August 31, 2024 ah mipui 68,000 lenna Vivekananda Yuba Bharati Krirangan, Kolkata ah khelh a ni ang. Kumina Durant Cup match hmasa ber chu July ni 27, 2024 khan Salt Lake Stadium, Kolkata ah champion lai Mohun Bagan SG leh Downtown Heroes FC ten an khel a ni.
Kokrajhar-ah hian Group E match bakah Quarter final match pakhat khelh tur a ni a. Group E ah hian ISL club pahnih – Odisha FC leh NorthEast United FC te bakah BSF Football Team leh Bodoland FC te’n quarter final luh an inchuh dawn a ni.